М. Оспанов «Сөз патшасы»: кітап таныстырылымы

28 наурыз күні Абай кітапханасында жерлесіміз ақын, абайтанушы Мұратбек Оспановтың 2024 жылы «Абай жолы кітапханасы» жобасы аясында жарыққа шыққан «Сөз патшасы» кітабының таныстырылымы өткізілді.
Шара барысында белгілі қаламгер, Қазақстан Республикасының Журналистер Одағының мүшесі М.Жанболатұлы, филология ғылымдарының докторы, профессор, Қазақстанның еңбек сіңірген қайраткері А.С. Еспенбетов, Семей қаласы ардагерлер кеңесінің төрағасы М. Әлиндер сөз алып, ақын туралы жүрекжарды ыстық естеліктерін көпшілікпен бөліссе, Абай облысы әкімінің кеңесшісі Халықаралық «Алаш» әдеби сыйлығының иегері Ербол Алшынбай М.Оспанов шығармашылығының тереңдігі жайында сөз қозғады.
ҚР «Мәдениет және өнер саласының үздігі», Әміре Қашаубаев атындағы сыйлықтың иегері, дәстүрлі әнші Айдан Бауыржанұлы көпшілікке жырдан шашу шашса, ф.ғ.к., профессор А.Қ. Қадыров, «Абай» журналының редакторы- А. Исиндер қызметтік қарым-қатыныстары жайында сөз қозғап, ақын еңбектеріне жоғары баға берді.
Арнайы кітап таныстырылымына ақынның жан-жары «Абай» журналының директоры Райхан Абылмансұрқызы, қыздары Әйгерім, Ақмарал, ұлы Еламан, сондай-ақ, Абай ауданынан – Қазақстан Жазушылар одағының мүшесі, ҚР «Мәдениет қайраткері» – Е.К. Оразалы , қоғам қайраткері, Ырғызбай әулетінің ұрпағы – Қ.Х. Верлишев, Абай ауданының ішкі саясат, мәдениет және тілдерді дамыту бөлімінің бас маманы – А. Н. Бакирова және қаламыздағы М.О.Әуезов атындағы педогогикалық колледж студенттері, БАҚ қатысты.
Сондай-ақ, Мұратбек Қабиденұлының өмір жолы, шығармашылығынан сыр шертетін «Жүрегімен жыр жазған» тақырыбында кең көлемді кітап көрмесі жасақталды. Көрмеге жазушының әр жылдарда шыққан еңбектері, мерзімді басылым беттерінде жарық көрген мақалалары және еңбегі үшін алған марапаттары қойылды.
Іс-шара соңында қаламгердің жұбайы Райхан Абылмансұрқызы, қыздары Әйгерім, Ақмарал кітапхана ұжымына, ұйымдастырушыларға зор алғысын білдіріп, шығармашылық жеміс тіледі.