Тәкен Әлімқұлов. Ақбоз ат : оқырмандар конференциясы

4 сәуір күні Абай кітапханасында «Бір ел, бір кітап» акциясы аясында қазақ прозасының көрнекті өкілдерінің бірі, дарынды прозашы, қаламгер Тәкен Әлімқұловтың шығармаларын оқырмандарға дәріптеу мақсатында «Ақбоз ат» туындысы бойынша оқырмандар конференциясы өткізілді.
Шара барысында кітапхана қызметкері сүбелі еңбектер жазған жазушының өмірбаяны, шығармашылығындағы өткірлік, азаматтық өнегесі туралы айтып, шығармашылығына тоқталды. Аталмыш іс-шараға қаламыздағы Әлихан Бөкейхан университетінің филология факультетінің 2 курс студенттері мен ұстаздары Жанар Жұмабекқызы жетекшілігімен қатысты.
Конференция барысында шығарманың идеясы, композициялық құрылысы, шығарманың бастауы, дамуы, байланысы, басты кейіпкер Қараштың бейнесі сөз етіліп, Елеусіздің азаматтығы жайында әңгіме қозғалып, шарықтау шегі – шығарманың шиеленісі жан-жақты талқыланды.
Студенттер шығарма жайында өз ойларын ортаға сала отырып, жазушы мен кейіпкер арасындағы үндестікті аша түсті.
Оқырман жүрегіне жол тапқан үздік туындыны, арадан қаншама жылдар өтсе де, жас оқырмандар қауымы жалықпастан, әлі де оқуға ниетті.
Қазақ прозасына ерекше леп әкелген Тәкен Әлімқұловтың есімін халқы құрметпен мәңгі есте сақтайды.