М. Иманжапар «Жарма өңірінің ақын-жазушылары»: кітап тұсаукесері

10 сәуір күні Абай кітапханасында Жарма ауданының Құрметті азаматы, зерттеуші-ғалым, филология ғылымдарының кандидаты, ұлағатты ұстаз, белгілі баспагер Мұрат Тлегенұлы Иманжапардың «Семей өңірінің ақын-жазушылары» сериясы аясында жарық көрген «Жарма өңірінің ақын-жазушылары» атты үш томдық еңбегінің тұсаукесер рәсімі өткізілді. Шараның мақсаты – қастерлі Жарма топырағынан түлеп ұшқан қалам иелерінің шығармашылық мұрасын ұрпақ санасына сіңіру, рухани қазынаны дәріптеу арқылы әдебиетіміздің алтын арқауын жалғау және өскелең ұрпақты ұлттық құндылыққа сусындатып, туған жерге деген сүйіспеншілігін арттыру.
Зиялы қауымның басын қосқан бұл маңызды жиын Мұрат Тлегенұлының жарық көрген жаңа туындысының елге таныстырылуымен ерекшеленді. Кітаптың тұсаукесер рәсімі автордың өмір жолында үлкен үлгі болған ұстазы, көрнекті ғалым Арап Еспенбетовке және танымал тарихшы, этнограф Мұхаметқазы Мұхамедиұлына салтанатты түрде табысталды. Жиын барысында жазушы, әдебиеттанушы, «Алаш арыстары Мұхтар Әуезов» музейінің меңгерушісі Қуат Қиықбай қаламгердің өмір жолы мен шығармашылығына терең үңіле отырып, «Жарма өңірінің ақын-жазушылары» жинағына енген тұлғалар жайлы мазмұнды баяндама жасады.
Сонымен қатар, Жарма ауданынан арнайы келген делегация өкілі, аудан әкімінің орынбасары Райым Нұрғалиев сөз сөйлеп, ұлағатты ұстазды жаңа туындысының тұсаукесерімен құттықтап, аудан әкімі Нұрлан Борсукбаевтың атынан «Жарма ауданына сіңірген ерекше еңбегі үшін» төсбелгісімен марапаттады. Бұл – ғалымның ел дамуына қосқан өлшеусіз еңбегінің еленгенінің айғағы.
Іс-шараға Жарма өңірінен келген зиялы қауым өкілдері мен қонақтар, сондай-ақ Шәкәрім университеті мен Әлихан Бөкейхан университетінің студенттері қатысты. Жиын барысында зиялы қауым Арап Еспенбетов, Мұхаметқазы Мұхамедиұлы, Бауыржан Ерденбеков, Тұрсын Шаңбай сынды елге танымал тұлғалар сөз алып, қаламгерге шығармашылық шабыт пен қажымас қайрат тіледі. Сондай-ақ, Мұрат Тлегенұлының шәкірті, айтыс өнерінің өкілі Серік Қуанған ұстазына арнау арнап, рухани кештің көркемдігін арттырса, Шәкәрім университеті Өнер факультетінің студенті, Қайрат Қабышевтің шәкірті Ілияс Сабырбаев тамаша әнімен көпшіліктің көңілінен шықты. Ал Жарма ауданынан келген делегация өкілі, ақын Жұмабақыт Рахметова жүрекжарды құттықтауын жеткізді.
Іс-шара соңында Мұрат Тлегенұлы ізгі тілегін білдіріп, жиналған қонақтарға шексіз алғысын айтты. Тұсаукесер – руханияттың жаңғыруына арналған тағылымды кешке айналып, әдебиетке жанашыр қауымның көңіл төрінен орын алды.