«Абай жолы» кітапханасы – жауһар туындылар: кең көлемді кітап көремесі

17 сәуір күні Абай кітапханасында «Ұлттық кітап күні» мерекесі аясында Өлкетану бағытына негізделген ««Абай жолы» кітапханасы – жауһар туындылар» атты кең көлемді кітап көрмесі ұйымдастырылды.
Көрмеге Семей жоғары көп салалы колледжінің студенттері қатысты.
Аталған көрмеде Абай облысы әкімінің қолдауымен жарық көрген «Абай жолы» кітапханасы сериясының 2023–2024 жылдары баспадан шыққан таңдаулы туындылары таныстырылды. Атап айтқанда, ұлы ойшыл Абай Құнанбайұлының «Шығармалары», Шәкәрім Құдайбердіұлының репринттік басылымы, сондай-ақ заманауи қаламгерлер – Несіпбек Айтұлының «Есіл де есіл, есіл күн…», Бауыржан Жақыптың «Қарауылтөбе», және Төлеужан Ысмайыловтың «Өмір гүлі» сынды кітаптары оқырман назарына ұсынылды.
Жоба аясында 2024 жылы жарық көрген Ә.Шәріповтің «Көргенім, көңілге түйгенім», Р.Нұрғалидың «Қазақ әдебиетінің алтын ғасыры», Қ.Жұмаділовтің «Тағдыр» романы, Б.Исабаевтың «Ұлылар мекені», Б.Тілегеновтың «Қара жел», А.Еспенбетовтің «Абайды оқы, таңырқан…» және т.б. жалпы саны 20 қаламгердің шығармалары Астана қаласындағы «Фолиант» баспасынан жарық көргені жайында айтылды.
Көрмені таныстыру барысында Б. Исабаевтың «Ұлылар мекені» – Абай Құнанбайұлының, Шәкәрім Құдайбердіұлының, Мұхтар Әуезов сынды ұлы тұлғалардың кіндік қаны тамған жердің тарихынан сыр шертетін құнды еңбек екендігі аталып өтті. Сондай-ақ, көрмеде А.Еспенбетовтің «Абайды оқы, таңырқан…» кітабындағы Абай өскен орта, абайтану ғылымы, ақынның бас шәкірті бөлімдеріне баса назар аударылды.