Кітапхана түні: мерекелік ойын-сауық бағдарламасы

18 сәуір күні Абай кітапханасында елімізде алғаш рет атап өткізілгелі отырған «Ұлттық кітап күні» мерекесі аясында «Кітапхана түні» мерекелік ойын сауық бағдарламасы өтті. Шараның мақсаты – кітап оқуға қызығушылықты арттыра отырып, кітапхананың мүмкіндіктерін кеңінен таныстыру және мәдени мұраны насихаттау.
Шараның шымылдығын Қалалық мәдениет Сарайының әншілері Омаровтар отбасы әсем әнмен ашып, жиналған жұртқа тамаша көңіл-күй сыйлады. Жиын барысында Абай облысының мәденет, тілдерді дамыту және архив ісі басқармасы басшысының міндетін атқарушы Жанжігіт Абзалбекұлы Омархан сөз алып, «Ұлттық кітап күні» мерекесінің маңызы мен мәніне тоқталып өтті. Сондай-ақ, мерекелік шарада Абай облыстық ардагерлер кеңесінің Төрағасы Мұрат Сейсенұлы Әлин кітапхана түніне жиналған қонақтарды мерекемен құттықтап, жүрек жарды тілектерін білдірді.
Мерекелік шараның ашылу салтанатында Қалалық мәдениет Сарайының әншісі Әсет Ахметов, Семей қаласындағы физика-математика бағытындағы Назарбаев Зияткерлік мектебінің оқушысы Есдаулет Серікқазин әннен шашу шашып, тағылымды шараның сәнін келтірді. Шара соңында Абай кітапханасының директоры Мерей Мейіртайұлы Қарт келген қонақтарға алғыс білдіріп, мерекемен құттықтады.
Бағдарлама аясында кітап көрмелері, қолөнершілердің этно-көрмелері, кітап авторларымен кездесулер, әдеби квиз, әдеби-сазды шаралар, суретші туындыларын тамашалау, халықаралық телемост, жас ақындар шеруі және би алаңдары ұйымдастырылды. Атап айтсақ: «Абай шығармашылығынан шабыттанамын», «Ерлік – елге тағзым, Ұрпаққа – ұран» көрмелері, Қолөнер көрмесі, мәдениет саласындағы мамандар арасында «Ұлы Абайға 180 жыл» атты әдеби квиз, «Жыр айтамын жүректен» атты ашық микрофон, кітапхана тарихы мен мерейтой иелері туралы интеллектуалды ойын және көңіл-күй көтеру шаралары.
«Ұлттық кітап күні» мерекесі аясында өткізілетін шаралар 23 сәуірге дейін өз жалғасын таппақ.