Қара сөздің дарабозы: еске алу кеші

18 сәуір күні Абай кітапханасында «Ұлттық кітап күні» мерекесі «Кітапхана түні» акциясы аясында Қазақстанның халық жазушысы, Қазақстан Республикасының Абай атындағы Мемлекеттік сыйлығының иегері Қабдеш Жұмаділовті еске алуға арналған «Қара сөздің дарабозы» атты кеш өтті.
Кешке қаламыздағы зиялы қауым өкілдері Қазақстан журналистер одағының мүшесі Мұхаметқазы Мұхамедиұлы, белгілі қаламгер, ақын Ақылбек Манабаевтың ұлы Айдар Манабаев, ақын Нұрмұхамет Садықұлы және Ерік Омарғали және т.б қатысты. Тұрсынғазы Рахимовтың немересі музыкалық училищенің студенті Досхан Тұрсынғазы, Ә. Қашаубаев атындағы мемлекеттік филармониясының әншісі, Тұрсынғазы Рахимовтың шәкірті Түктібаев Бақытжан Шоқанұлы және «№ 17 ЖОББМ» КММ мектебінің ұстазы Жанат Бекайдарқызы 10 «Ә» сынып оқушыларымен қатысты.
Шарада Қабдеш Жұмаділовтің өмірбаяны, Қытайда болған кезеңдері, атқарған қызметі мен шығармашылығы жайлы кеңінен сөз қозғалып, арнау оқылды. Қабдеш Жұмаділов және Дулат Исабековтың бейнебаяндағы сөздері, жазушының ұлы Арман Қабдешұлының лебізі айтылған бейнебаяны көрсетіліп, әннен шашу шашылып, экраннан жазушы өмірі жайлы слайд қойылды. Қонақтарға қаламгер өмірінен терең деректер беретін «Қара сөздің дарабозы» тақырыбындағы кең көлемді мерзімді басылымдар мен кітап көрмесі ұсынылды.
Қара сөздің дарабозы атанған Қабдеш Жұмаділовтың өмірі мен жүрген жолынан терең мағлұматтар алған шараға қатысушы әрбір қонақтарға кеш тамаша әсер қалдырды. Шара соңында қонақтар еске алу кешінен есте қалар фотосуретке түсіп, жазушының ғибратты ғұмырына тәнті болып тарасты.