Жеңіске – мәңгілік тағзым: ақпараттық сағат

Абай кітапханасының қызметкерлері №31767 әскери бөліміне барып, Ұлы Отан соғысының 80 жылдығына арналған « Жеңіске – мәңгілік тағзым» атты ақпараттық сағат өткізді.
Іс-шара барысында қатысушыларға Семей өңірінен майданға аттанған жауынгерлер, семейлік Кеңес Одағының батырлары, сондай-ақ соғыс жылдарында Семейде құрылған әскери дивизиялар жайлы ақпарат ұсынылды. Слайд-шоу арқылы батырлардың ерен ерліктері баяндалып, олардың есімдері мен ерліктері туралы кең мағлұмат берілді.
Сонымен қатар, соғыс жылдарында Семей халқының тылдағы қажырлы еңбегі мен жеңісті жақындатуға қосқан үлесі де назардан тыс қалмады. Семейде жұмыс істеген өндіріс орындары мен олардың соғысқа көрсеткен көмегі туралы деректер келтірілді.
Іс-шара аясында қазақтың батыр қызы, мерген Әлия Молдағұлованың туғанына 100 жыл толуына орай, оның өмір жолына арналған бейнеролик көрсетіліп, қайсарлығы мен ерлігі туралы айтылды.
Шара барысында соғыс тақырыбына арналған арнайы көрме қойылып, әскери бөлім сарбаздарының назарына ұсынылды. Сонымен қатар, №31767 әскери бөлімінің атынан Абай кітапханасының қызметкерлеріне алғыс хаттар табысталды.
Жеңістің 80 жылдығы – ерлікке бас иіп, өткенге тағзым ету. Жылдар жылжып, ұрпақ ауысса да, отты жылдардың естелігі ел жадынан өшпек емес!