М. Оспанов «Абай мұрасының шырақшысы»: кітап тұсаукесері

10 мамыр күні Абай кітапханасында жерлесіміз ақын, абайтанушы Мұратбек Оспановтың «Абай мұрасының шырақшысы» кітабының тұсаукесері өткізілді. Шараға ақынның туыстары, курстас достары, мәдениет саласының қызметкерлері қатысты.
Шара барысында Абай облысы Ішкі саясат басқармасының басшысы Айдар Садырбаев сөз алып, ақынның жан-жақтылығына тоқталып, шығармашылығының шоқтығының биіктігі жайында әңгіме қозғады. Курстастары, достары, Жетісу облысының әкімі Бейбіт Исабаев пен Жазушы-журналист, Халықаралық «Алаш» әдеби сыйлығының лауреаты, Қазақстан Журналистер одағы сыйлығының екі мәрте лауреаты, халықаралық ақпараттандыру академиясының академигі, кеден қызметінің полковнигі Бекен Нұрахметов, белгілі ақын, әрі көсемсөзші, ШҚО әкімінің кеңесшісі Құлтас Достанов ақын достары Мұратбек Оспановты еске алып, шуақты сәттермен бөлісті.
Қаламгердің жаңа ғана баспадан жарық көрген «Абай мұрасының шырақшысы» кітабының тұсаукесер рәсімі жасалды. Бұл кітапта өмірінің мәнін өлеңмен өрнектеген, ақиқат пен ардың ақ жолында қалам тербеткен М.Оспановтың поэзиялық мұрасы жинақталған.
Ақынды еске алып, Семей қаласының «Ақындар орталығының» жас ақындары М.Оспановқа арнау арнады. Сондай-ақ, Мұратбек Қабиденұлының өмір жолы, шығармашылығынан сыр шертетін «Жүрегімен жыр жазған» тақырыбында кең көлемді кітап көрмесі жасақталды. Көрмеге жазушының әр жылдарда шыққан еңбектері, мерзімді басылым беттерінде жарық көрген мақалалары және еңбегі үшін алған марапаттары қойылды. Слайд көрсетілімі болды.
Іс-шара соңында қаламгердің қызы Оспанова Әйгерім Мұратбекқызы ақын қолжазбаларын Абай кітапханасының қорына табыстады.