Д.Әлімақын «Америка ашқан қазақтар»: кітап тұсаукесері

22 мамыр күні Абай кітапханасында журналист, ақын, Қазақстан Жазушылар одағының мүшесі Дүйсенәлі Әлімақынның «Америка ашқан қазақтар» атты кітабының тұсаукесер рәсімі өтті.
Кештің шымылдығын кітапхана директоры, ақын Мерей Қарт ашып, жиналған қауымды автордың шығармашылық жолымен таныстырды. Өз кезегінде Дүйсенәлі Әлімақын кітаптың мазмұны мен жазылу барысындағы қызықты сәттерімен бөлісіп, АҚШ кітапханаларынан табылған құнды деректер жайлы кеңінен әңгімеледі. Көп жылғы ізденістің нәтижесінде жарық көрген бұл еңбекте автор Питтсбург, Нью-Йорк, Джорджтаун сынды Америкадағы беделді университеттердің ғылыми кітапханаларында сақталған тарихи құжаттар мен сирек деректер негізінде қазақ халқы жайлы тың мәліметтерді ұсынған.
Салтанатты шарада Абай облысы әкімінің кеңесшісі, Халықаралық «Алаш» әдеби сыйлығының иегері Ербол Алшынбай облыс әкімі Б.Уәлидің құттықтау хатын жеткізіп, авторға арнайы сый табыс етті. Сонымен қатар, Шәкәрім университетінің профессоры, Қазақстанның еңбек сіңірген қайраткері Арап Еспенбетов пен М.Әуезов атындағы педагогикалық колледж директоры Шағангүл Жанаева сөз сөйлеп, қаламгерге шығармашылық табыс тіледі.
Әдеби жиын аясында Ә.Қашаубаев атындағы филармонияның күйшісі Абай Оралбекұлы Құрманғазының күйін орындап, кештің көркемдік деңгейін арттыра түсті.
Іс-шараға Абай облысы мәдениет, тілдерді дамыту және архив ісі басқармасы басшысының орынбасары Олжас Амангелдіұлы, зиялы қауым өкілдері, ұстаздар мен студент жастар қатысты.
Бұл кеш – рухани жаңғыру мен тарихи танымның түйіскен сәті, қазақтың өткенін шетел мұрағаттарынан іздеген еңбектің жемісі болды.