Ш. Қалиақпаров «Жоспармен жойылған тұлға»: кітап тұсаукесері
29 мамыр күні Абай кітапханасында 31 мамыр қуғын – сүргін құрбандарын еске алу күніне орай, Қорғаныс министрлігінің отставкадағы полковнигі, ҚР Журналистер және Жазушылар одағының мүшесі Шаймардан Ахмарұлы Қалиақпаровтың 1937 жылы қуғынға ұшыраған, қазақтан шыққан тұңғыш жоспарлаушы экономист, профессоры – Әзімбай Лекеров туралы жазылған «Жоспармен жойылған тұлға» атты үш томдық кітабының тұсаукесері өтті.
Тұсаукесерге Семей қаласының зиялы қауымы: ғалымдар Зейнолла Қалымбекұлы мен зердесі хатқа түскен тарихтай көкірегі кең аға буын өкілі, этнограф-тарихшы, Қазақстан Журналистер Одағының мүшесі, Халық ағарту ісінің үздігі Мұхаметқазы Мұхамадиұлы, Қазақстанның Журналистер одағының мүшесі, Семей қаласының, Абай ауданының құрметті азаматы ҚР. Мәдениет саласының үздігі, облыс ардагерлер кеңесінің төрағасы Алин Мұрат Сейсенұлы, қаламыздағы Әміре Қашаубаев атындағы филармонияның әншісі Түктібаев Бақытжан Шоқанұлы, журналист, көркем тілді жазушы, баспагер Сайлау Төлеуов, Байжұманнан тараған ұрпақ – Лекерова Бибінұр Ғалымжанқызы шараға қатысты. Ә. Лекеровтың ауылдастары -Тоқтархан ата, Ә. Лекеров атындағы негізгі мектеп директоры қызметін атқарған Ерденбеков Амангелді, Абдуллин Ерлан Құмарбекұлы, Әзімбаймен байланысты жазықсыз атылған он екі азаматтың бірі Әлжанның Сағадиының немересі – Сағадиев Бекжан және Шәкәрім атындағы университет пен М.О. Әуезов атындағы педагогикалық колледж студенттері де шараның куәгерлері болды.
Саяси қуғын-сүргін құрбандарын еске алу күніне арналған шарада Әзімбай Лекеровтың өмірбаяны, еңбек жолы, саяси қызметі туралы айтылды.
Шара қонақтарына «Халықтың қамын ойлаған қайраткер» тақырыбындағы кең көлемді көрме ұсынылды. Көрмеге кітапхана қорында сақталған мерзімді басылымдардағы Ә. Лекеровтың мақалалары, ол туралы жазылған деректер және Айседора Лекерованың әкесі мен анасы жайлы жазылған кітаптары, Ш. Қалиақпаровтың сиясы кептеген «Жоспармен жойылған тұлға» атты үш томдық кітабы қойылып, Ә. Лекеров туралы бейне сюжет ұсынылды.
Келген қонақтар шарадан мол мағлұматтар алып өздерінің ризашылықтарын білдіріп тарқасты.