Оқимыз, ойнаймыз, көңіл көтереміз: мерекелік бағдарлама

1 маусым – Халықаралық балаларды қорғау күні мен «Қазақстан балалары» ұлттық науқанын мерекелеу аясында Абай кітапханасының балалар әдебиеті бөлімінің қызметкерлері «Оқимыз, ойнаймыз, көңіл көтереміз» атты ашық алаңдағы мерекелік шара ұйымдастырды. Кітапхана алдындағы алаңда балаларға арналып шатыр тігіліп, «Кітаппен бірге – қызықты жаз» атты кітап көрмесі қойылды. Көрмеге қазақ, орыс және шетел ертегілері, балалар жазушыларының шығармалары, танымдық әдебиеттер мен энциклопедиялар ұсынылды.
Мерекелік бағдарламада балаларға арналған «Кім жылдам?», «Балықшы және балықтар», «Арқан тарту», «Доппен ойын» сынды қызықты ойындар ұйымдастырылып, қатысушылар белсене атсалысты. Кеш барысында балалар ән айтып, би билеп, шат-шадыман көңіл күйде болды. Балалар мен жастар шығармашылық сарайының «Алаш» вокалдық студиясының жас әншілері «Мен қазақпын», «Я подарю вам ландыши», «Туған қалам – Семейім» әндерін орындаса, «Аяла» би студиясының өнерпаздары «До-ре-ми» және «Летай с нами» билерін тарту етті.
Сондай-ақ, «Yellow» шығармашылық студиясының жетекшісі С.Ж. Сальникованың бастамасымен ұйымдастырылған «Әлем балалардың көзімен» атты сурет көрмесі көпшілік назарына ұсынылды. Шара соңында барлық қатысушылар әлемге танымал қазақ әншісі Димаш Құдайбергеннің музыкалық трендіне арналған флэшмоб биіне қатысты.
Балалар шатырының астында қатысушылар үшін түрлі шеберлік сабақтары өткізіліп, олардың шығармашылық қабілеттерін дамытуға жағдай жасалды. Мереке соңында барлық қатысушылар Абай кітапханасы әкімшілігінің алғыс хаттары мен грамоталарына ие болды.