Алаштың асыл мұралары: кең көлемді сирек кітаптар көрмесі
30 мамыр күні Абай кітапханасында 31 мамыр саяси қуғын-сүргін, ашаршылық құрбандарын еске алу күні аясында «Алаштың асыл мұралары» атты кең көлемді сирек кітаптар көрмесі ұйымдастырылды.
Шараға қаламыздағы зиялы қауым өкілдері, қала және ауыл тұрғындары, Шәкәрім университеті және М.О. Әуезов атындағы педагогикалық колледж студенттері қатысты.
Көрме кітапханамыздың бай қорындағы Алаш зиялыларының көзі тірісінде жария көрген еңбектерімен ерекшеленеді. Кітапхананың алтын қорындағы сирек кітаптардан құралған көрмеде «Императорлық Орыс Географиялық Қоғамының Батыс-Сібір Бөлімінің Семей Бөлімшесінің Запискилеріндегі» Ә. Бөкейханның, Ж. Ақбаевтың ғылыми мақалалары, А. Мамытұлының «Денсаулық жолында», Ж. Тілеулиннің «Жұқпалы науқастар», Х. Жүсіпбековтың «Қарсақбай», Отчет совета Общества по печения о начальном образовании в г. Семипалатинск за 1993/94 г., Қ. Тайшықұлының «Өктәбір ұшқыны», Ф. Сенюшкиннің «Культурно-просветительная работа», Е. Бекмахановтың «Казахстан в 20-40 годы ХІХ века, «Әдебиет майданы» журналының 1937 ж., № 4 саны, Ә. Ермековтың «Ұлы математика курсы», Т. Шонанұлының «Орыстарға қазақ тілін үйреткіш» оқулығы, Х. Досмұхамедовтың «Как бороться с чумой среди киргизского населения», С.М. Дүкенбайұлының «Бөртпе сүзек және онымен күресу», Б. Майлыұлының «Он жылда», С. Сейфуллиннің «Қызыл ат», Саяси қуғын-сүргін құрбандарын толық ақтау жөніндегі Мемлекеттік комиссияның материалдары (ХХ ғасырдың 20-50 жылдары) 52 томы, «Абай жолы» топтамасымен жарыққа шыққан «Тарих қойнауынан» үшінші кітабы, Ж. Күдерұлының «Өсімдіктану», Ә. Ермековтың «Ұлы математика курсы» 1-бөлімі, І. Жансүгіровтың «Кеңес» сынды т.б. тұлғалардың түпнұсқа еңбектері қойылды.
Ерекше туындылармен топтастырылған көрмемен танысу шара қонақтары үшін керемет жаңалық болды. Қоғам қайраткерлерінің төл туындылары мен қуғын-сүргін, ашаршылық құрбандарының өмірі жайлы мол деректер алған оқырмандар терең толғаныспен әсерлі сезіммен тарқасты.