Қазақтың қайсар ғалымы: кең көлемді кітап көрмесі

Абай кітапханасында ғалым, абайтанушы, қоғам қайраткері Қайым Мұхамедханұлының туғанына 110 жыл толуына орай «Қазақтың қайсар ғалымы» атты кең көлемді кітап көрмесі ұйымдастырылды. Кітапханамыздың бай қорында сақталған ғалым мұралары «Екпінді», «Иртыш», «Семей правдасы», «Семей таңы», «Ертіс өңірі», «Дидар», «Қазақ әдебиеті» беттерінде жария көрген мақалалары мен кітаптары көрмеден орын алды. 2025 жылы «Абай жолы» кітапханасы топтамасымен шыққан Қайым Мұхамедханұлының «Абайдың ақын шәкірттері» (1-кітап); «Абайдың ақын шәкірттері» (2-кітап);  «Абай мұрагерлері»  (3-кітап) шығармалары да көрме төрінен орын алды.

Көрме қонақтары ғалымның қажырлы еңбегінің нәтижесінде қалыптасқан «Абайдың ақын шәкірттері» мен «Абай мұрагерлері» мұрасын бір арнаға тоғыстырған «Абай-Алаш» ғылыми тұжырымдамасымен, тағдырлы да тағылымды ғұмыр жолымен, ғылымға, ұстаздыққа, шындыққа адалдығымен кеңінен танысты. Қайым Мұхамедханұлының өмірлік ұстанымын айқындайтын «Бақыт дегенің – еркіндікте өмір сүру, адал болу» деген қағидасы көрме мазмұны арқылы жас ұрпаққа рухани бағдар болып ұсынылды.