Кітапхана түні – 2014
Абай атындағы кітапханасы “Нұр Отан” ХДП Жоғарғы партия мектебінің Шығыс Қазақстан аймақтық филиалы және «Еураз-шоу» ән-би театры бірлесіп 2014 жылы 26 сәуірде кешкі саған 18:00-22:00-ге «Кітапхананың түнгі әлемі» мерекелік іс-шарасын өткізіп, қала тұрғындарына түрлі мәдени шаралар ұсынды.
Мерекелік шараны «Еураз-шоу» ән-би театрының бишілері «Кесе сылдыры» биімен ашып, ыстық ықылас танытты.
«Кітапхананың түнгі әлеміне» жиналған қала тұрғындарын кітапхана түніне арнайы жасақталған түрлі тақырыптағы кітап көрмелері мен Семей қолөнер шеберлерінің сәндік-қолданбалы өнерінен жасақталған этнографиялық көрме қарсы алады. Шара басталысымен 23- сәуір бүкіләлемдік кітап және авторлық құқық күні қарсаңында кітапхана қорын өлкемізден шыққан танымал тұлғалардың толық шығармалырымен қорды толықтыру мақсатында өлкеміздегі қаламгер ақын-жазушылар арасында өткізілген «Сіздің шығармаңыз, Жастар игілігі үшін!» акциясы қорытындыланып, зиялы қауымды марапаттады.
ШҚО қылмыстық-атқару жүйесі Семей қаласы Приречный кентіндегі ОВ -156/16 мекемесі жолдаған хатына сәйкес мекемеде жазасын өтеушілер үшін біздің кітапханамыз оқырмандар арасында «Кітапханаға кітап сыйла» акциялары ұйымдастырып, аталған мекемеге 662 қазақ және орыс тілдеріндегі ғылыми-көпшілік және көркем әдебиеттер сыйға тартты.
Кітапхананың сирек басылымдар қорынан 18-19 ғасырларда жарық көрген, басылымдардан «Рухани қазына – ғасырдан-ғасырға», «Түркі әлемінің деректі шежіресі», «Қазақтың салт-дәстүрлері», «Қазақтың ұлттық ойындары» және Халықаралық «ЭКСПО-2017» көрмесіне арналған «Болашақтың энергиясы – Қазақстанның болашағы» тақырыптарында жасақталған кітап көрмелеріне шолу жүргізілді. Кітапхананың түнгі қонақтары ұлттық ойын-сауық бағдарламасына қатысып, қазақтың ұлттық ойындарын ойнады. Көршілес Ресейдің Барнаул қаласынан Семей қаласына қонаққа келген қатысушылар үшін сирек басылымдар қорынан жасақталған ретро-көрме ерекше жаңалық болды.
Қолөнер шеберлерінің қолынан туындаған бұйымдарға қатысушылар ерекше көзқарас танытып, қолданбалы өнердің қыр-сырымен танысты. Шеберлер ықылас танытқан қонақтарға шеберлік класстарын өткізді.
Семейлік ақын-жазушылардың шығармаларынан «Сыйға тартылған кітаптар» тақырыбындағы кітап көрмесі жасақталып, жергілікті ақын-жазушылармен сұхбат алаңы ұйымдастырылды. Қатысушылар жергілікті ақын-жазушылармен сұхбаттасып, авторлық қолтаңбасын алып, естелік фотсурет түсті. «Мәңгілік ел: ақындар шеруі» тақырыбында жас ақындардың шеруі өткізілді. Жас айтыскер ақындар арасында ақындар айтысы ұйымдастырылып, қатысушылар ақындар өнеріне тәнті болды.
«Кітапхана таным-білім алаңы» тақырыбында өткізілген түрлі тақырыптағы білім фестивалі қатысушылар үшін нағыз білім сайысы болды. Білім сайысының жеңімпаздары жауап берген сұрақтарының санына байланысты жетондар жинап, нақтыланған жеңімпаздар арнайы сыйлықтарға ие болды. Семей өңірінің тарихы, мәдени орындары т.б. туралы «Туған өлкеге саяхат» тақырыбында электронды басылымдарға виртуальды шолу жүргізілді.
Шара барысында қаламыздағы Кітапхананың үлкен залында балар мен жастарға «Еураз-шоу» ән театры өздерінің мерекелік, әдеби-сазды бағдарламасын ұсынып, «X-Ray» би мектебімен бірге қатысушыларға түрлі би билеуден шеберлік класын өткізді. Караоке ән алаңы әнсүйер қауым үшін сүйікті әндерін сыйлап, қонақтарды ерекше көңіл-күйге бөледі.
Кітапхана түніндегі барлық бағдарламаларға қала жұртшылығы белсене қатысып, кітапханада оқырмандар қатары жаңа оқырмандармен толықты. Түнгі мерекелік бағдарлама «Еураз-шоу» ән театрының дайындаған би кешімен аяқталды.