Ғалым, абайтанушы, қоғам қайратері Қайым Мұхаметхановты еске алу күні
2014 жылдың маусым айының 30-шы жұлдызында Семей қаласының Шәкәрім атындағы мемлекеттік университетінің «Шәкәрімтану» ғылыми-зерттеу орталығының ұйымдастыруымен көрнекті ғалым, абайтанушы, әдебиеттанушы, қоғам қайраткері Қайым Мұхаметхановтың дүниеден өткеніне 10 жыл толуына орай ғалымды еске алу күні ұйымдастырылып, өткізілді.
Қайым Мұхаметханов ескерткіші жанында өткен аталмыш шараға зиялы қауым өкілдері, ғалымның шәкірттері, ғалымдар, зерттеушілер, жоғары оқу орындарының оқытушылары, магистранттар және Абай атындағы кітапхана қызметкерлері қатысты. Шараны Шәкәрім атындағы университеттің филология факультетінің студенті Ибраева Назгүл өзінің «Қайымға арнау» өлеңімен ашты. Ғалымнан дәріс алған шәкірттері, жазушылар: А.Еспенбетов, Т.Ибрагимов, М.Сұлтанбеков, Қ.Нұрқасым өз естеліктерімен бөлісіп, Семей қаласының бір көшесіне Қайым Мұхаметхановтың есімі берілсе екен деген ұсыныстарын білдірді. Шара соңында ескерткіш басына гүл шоқтары қойылды.