Германия елшілігінің сыйға тартқан кітаптары: тұсаукесер

  • 14.08.2014

Абай атындағы әмбебап кітапханасында ұлы Абайдың 169 жылдық мерекесі қарсаңында 2014 жылдың 14 тамызы күні Астана қаласынан келген Германия Федеративтік Республикасы елшілігінің бірінші хатшысы Джонни Крамер қонақта болды.

01

А.С.Пушкин атындағы облыстық кітапханасы әлемнің кез-келген нүктесінен Абайдың әдеби мұрасын, аудармаларын, өмірі мен шығармашылығы туралы ғылыми-зерттеулерді пайдалануға мүмкіндік беру мақсатында «Біздің Абай» электрондық кітапханасын іске асыруда. Біздің кітапханамыз осы жобаның серіктесі ретінде жобаға қолдау көрсетуде.

02

Кітапхана жанынан ашылған «Абайдың рухани орталығына» биылғы жылдан бастап, Абай шығармаларын жинау мақсатында елшіліктерге хат жазылып, шетел тілдеріндегі Абай шығармалары жинақтала бастады. Жыл басынан бері азербайжан, венгр тіліндегі шығармалармен кітапхана қоры толықса, бүгін неміс елшілігінен Джонни Крамер кітапхана қорына салтанатты түрде неміс тіліндегі Абайдың қарасөздері мен М.Әуезовтың «Абай жолы» романын сыйға тартты. Д.Крамер өз сөзінде Абай шығармаларының неміс оқырмандары үшін де құнды қазына екендігін айта келіп, неміс тіліндегі Абай шығармаларының қазақ елі оқырмандары үшін де қымбат екендігін мақтанышпен атап өтті.

Шараға қатысқан қала әкімі А.К.Каримов Абай шығармаларының қазақ халқының мәңгілік мұрасы, жастардың өмір бойғы рухани байлығы екенін айта келіп, неміс тіліндегі Абай шығармалары өз оқырмандарын табатынына сенім білдірді. Джонни Крамерге семейліктердің атынан сыйлығын ұсынып, өз ризашылығын білдірді.

03

Шараға қатысушылар ұлы ақын шығармашылығынан мол мағлұмат беретін «Әлемге танылған тұлға» тақырыбында кең көлемді кітап көрмесімен танысты. Шараға қалалық ішкі саясат бөлімінің мамандары, мәдениет мекемелері қызметкерлері, Қазақстан Халықтары Ассамблеясы мәдени орталығының өкілдері, зиялы қауым және БАҚ өкілдері қатысты.

«Айнхайт» неміс ансамблі Абайдың аудамасындағы Гетенің «Қараңғы түнде тау қалғып» өлеңін үш тілде, қоғам қайраткері, композитор, облыстық филармонияның әншісі Т.Рахимов Абайдың «Сегіз аяқ» әнін орындап, шетелдік қонақтарды Абай әндерімен таныстырды.

Қатысушылар шара соңында Абайдың рухани орталығында жасақталған Абай оқыған әдебиеттер әлемімен танысты.