Жусан иісті дара талант: ойталқы

2014 жылдың 16 қыркүйегінде Абай атындағы кітапхана қызметкерлері М.О.Әуезов атындағы педагогикалық колледждің студенттеріне «Жусан иісті дара талант» тақырыбында ойталқы ұйымдастырды.

Елімізде рухани құндылықтарды қалыптастыру мақсатында көптеген игі істер атқарылып келеді. Соның бірі – «Бір ел – бір кітап» акциясы. Биыл осы акция аясында Сайын Мұратбековтың «Жусан иісі», «Басында Үшқараның» атты шығармалары оқырмандар назарына ұсынылған болатын.

Шара барысында еліміздің мәдени өміріндегі кітаптың орны, кітап оқу мәселелері және «Бір ел – бір кітап» акциясы туралы мәліметтер бере отырып, Сайын Мұратбековтың шығармашылығына шолу жасалды. «Жусан иісі» шығармасының мазмұнын талдау барысында, оқырмандар екі топқа бөлініп, басты кейіпкер Аянның бейнесі жан-жақты талқыланды. Шараны қорытындылау бөлімінде шығарманы өз қиялдарымен аяқтау мақсатында «Аянның болашағы» атты ауызша шығармашылық жұмыс ұйымдастырылды. Ойталқыға қатысушылар осы шығарма туралы өз пікірлерін ортаға сала отырып, біршама сұрақтар төңірегінде пікір алысты. Шығарма желісі туралы өз пікірлерін ұшқыр ойымен, көркем әдеби тілімен жан-жақты талдай білген Арманова Балжан, Секенова Мунира мақтау қағаздарымен марапатталса, слайд көрсетілімдері арқылы ұсынылған викториналық сұрақтарға ұтымды жауап берген Болатова Балжан, Ғұмарова Бағжан, Сейілова Гүлжан, Шерікбай Тамаша сияқты студенттерге кітаптар сыйға тартылды. Аталмыш колледждің 32 «Ә» тобының студенті Қалижарова Жәмилә шараның соңында «Жусан иісі» шығармасынан үзіндіні мәнерлеп, нақышына келтіре орындап берді.