«Қош келдің, жас оқырман!»: білім фестивалі
Абай атындағы кітапхана 2014 жылы 20 қыркүйек күні «Нұр Отан» Партияның Саяси менеджмент мектебінің Шығыс Қазақстан аймақтық филиалының бірге және «Еураз шоу» ән-би театрымен бірлесіп Шығыс Қазақстан облыстық мәдениет, мұрағаттар және құжаттама басқармасынан бастау алған “Мәдени сенбілік” акциясы аясында «Қош келдің, жаңа оқырман!» атты білім фестивалін өткізді.
Айтулы акция кітапханамыздың бай қорын таныстыру және жас оқырмандардың ақпаратқа қол жетімділігін арттырып, кітап оқуға деген ынталарын арттыру мақсатында ұйымдастырылды. Шара барысында Шәкәрім университетінің тарих кафедрасының доценті, этнограф-тарихшы, Қазақстан халық ағарту ісінің үздігі М.Мұхамадиұлы бірінші курс студенттерін жаңа оқу жылымен құттықтап, сәт-сапар тіледі.
Қаламыздың ЖОО мен колледждерінің 1-курс студенттері кітапханада бас қосып, жас оқырмандарды кітапхана қорындағы оқулықтар әлемінен жасақталған «1 курс студенттері, Сіздер үшін!» тақырыбындағы кең көлемді кітап көрмесі қарсы алды. Қатысушылар оқу бағдарламасына қатысты әр саладағы оқу құралдарымен танысып, көрме кітапханашылардың жасаған шолуымен ұштасты.
Студенттер қауымы «Семей өңірінің танымал тұлғалары», «Ғажайыптар әлемі» (ағылшын тілі бойынша), «Қазақ тілін қаншалықты білесің?», «Өз тарихыңды танып біл» (Алаш арыстары бойынша) тақырыптарына ұйымдастырылған интеллектуалды ойын алаңында өз білімдерін саралап, белсене қатысқан Қаржы колледжінің студенттері А.Сәулебекова, Қ.Жұмағалиев, Д.Бектас және Радиотехника және байланыс колледжінің студенті Р.Самархановтар тегін оқырман билеттерін иеленіп, сыйға кітаптар алды. Студенттер QR-кодталған кітаптарды ұялы телефондарына көшіріп алып оқуға зор мүмкіндік алды. Жас оқырмандар кітапханамыздағы «Абайдың рухани орталығындағы» Абай атамыздың қолының табы қалған кітаптармен қауышып, кітапханамыздың алтын қоры болып саналатын сирек басылымдарың әрқайсысымен жақынырақ танысты. Кітапхана қабырғасында құрылған жас ақындар орталығының жастары №22 мектеп-гимназиясының оқушысы Жакина Гүлім мен Бизнес колледждің 2-курс студенті Аманжанова Салтанат өздерінің арнау өлеңдерін оқып, 1- курс студенттерін құттықтады.
«Еураз-шоу» ән-би театрының әртістерінің көрсеткен өнерлері кітапханамызға енді ғана аяқ басып тұрған оқырмандарға көтеріңкі көңіл күй сыйлап, шара соңы би кешіне ұласты. Өткізілген шара нәтижесінде кітапханаға 60-тан артық жаңа оқырман жазылып, кітапхана оқырмандарының саны артты. Жас оқырмандарға арналған аталмыш шара маңызды, әрі тартымды өтті.