Өзекті мәселелер газет беттерінде: журналистермен кездесу

Абай атындағы әмбебап кітапханасында 2014 жылдың 10 желтоқсанында Шығыс Қазақстан облыстық «Рудный Алтай» газетінің журналистерімен кездесу болып өтті.

Кездесуге газеттің бас редакторы О.С.Шабалина, жаңалықтар бөлімінің басшысы И.В. Осипова, экономика бөлімінің басшысы В.В. Никифоров және газеттің Семей қаласы бойынша тілшісі Екатерина Гуляева қатысты. Кездесудің шымылдығы кітапхана қызметкерлері дайындаған газеттің шығу тарихын баяндаумен ашылды. Тарихи деректерге сүйенсек, аталмыш газет 1918 жылдан бастап жарияланып келеді. Сол уақыттан бастап бұл мерзімді басылымның атауы 9 мәрте өзгерсе де, бұл газет өңірдегі ғана емес, еліміздегі ең үздік газеттердің бірі болып отыр. Кітапхана қызметкерлері қала тұрғындарын толғандыратын өзекті мәселелерді қозғап, журналисттерге көкейкесті сұрақтарын қойды. Олар мерзімді басылымдар беттерінен кітапхана ғимаратының жөндеуден өтуі, қала көшелерінің жарықпен қамтамасыз етілуі, медициналық қызметтер бағалары, жылу жүйелері, қаңырап қалған қаланың жылу қазандықтары және т.б. маңызды мәселелердің шешімдерін көруді қалайтындарын айтты. Кездесу қызықты, әрі әсерлі өтті. Келген қонақтар кітапханашылардың белсенділіктерін атап айтып, «Рудный Алтай» газеті беттерінде жариялайтын көптеген қажетті мағлұматтар алғандарын жеткізді.