Көшпенділер өркениетін танушы: кітап көрмесі

2015 жылдың қаңтар айының 16 жұлдызында Абай атындағы кітапханасында «Көшпенділер өркениетін танушы» айдарымен аса көрнекті жазушы Ілияс Есенберлиннің туғанына 100 жыл толуына орай, жазушының өмірі мен шығармашылығынан кітап көрмесі ұйымдастырылды.

Қазақ елінің тағдыры мен тарихы туралы келелі ой қозғаған Ілияс Есенберлин – қазақ әдебиетінің ғана емес, қазақ халқы тарихының төрінен лайықты орын алатын дара тұлға. Жазушы мерейтойы қазақ хандығының 550 жылдығымен тұс па тұс келіп отыр. Қазақстан Республикасы мемлекеттік сыйлығының лауреаты, қазақ әдебиетінің тарихында бүгінге дейін ең көп роман жазған жазушы, соның ішінде «Айқас», «Қатерлі өткел», «Алыстағы арпалыс», «Маңғыстау майданы», «Ғашықтар» т.б. тарихи романдары қазақ әдебиетінде оған дейін көтерілмеген мәселелерді қозғаған, жаңа леп, жаңа серпін әкелген туындылар болып табылады. Жазушының тарихи романдары туралы Р.Бердібаев: «… І.Есенберлиннің «Көшпенділер» трилогиясы қазақ халқы өмірінің ХҮ-ХІХ ғасыр аралығындағы оқиғаларын, даму тенденцияларын, халықтың басына түскен ауыртпалықтар, қиындықтар, өштіктер тарихы айтылады. Халық арасынан шыққан батырлардың, жыраулардың, мемлекет қайраткерлерініңобраздары шынайы суреттелген…». І.Есенберлиннің прозасы түгел дерлік орыс тіліне аударылды. Жазушының еңбегі жоғары бағаланып, «Еңбек Қызыл Ту» орденімен, медальдармен марапатталған. Осы және өзге де ақпараттар туралы кітап көрмесінде ұсынылып отырған кітаптар және мерзімді басылымдардан ала аласыздар. Барлығы кітап көрмесіне 32 кітап және 7 мерзімді басылым қойылған.