Ғасыр сазын тербеген: тақырыптық әңгіме

Қазақтың музыкалық мәдениетіне композитор, дирижер, орындаушы ретінде өшпес із қалдырған дара тұлға – Нұрғиса Тілендиевтің туғанына биыл 90 жыл. Абай атындағы әмбебап кітапханасының өнер бөлімінде 2015 жылы 15 қаңтар күні ұйымдастырылған Ғасыр сазын тербеген атты тақырыптық әңгіме сазгердің мерейтойына арналып отыр.

Іс-шара барысында кітапхана қызметкерлері сазгердің өмірі мен шығармашылығы және оркестрге арналған «Ата толғауы», «Ақсақ құлан», «Аққу», «Арман», «Махамбет», «Көш керуен» поэмалары мен «Халық қуанышы», «Қайрат», «Жеңіс салтанаты» атты кіріспелері жайында әңгімелеп берді. Сондай-ақ кітап көрмесіне шолу жасалып өтті.

Тілендіұлы Нұрғиса өзінің барша қабілет – дарынын халқының рухын асқақтатуға арнады. Оның музыкасы баланың да, дананың да жүрегіне жол тауып, дүйім жұрттың рухани жан серігіне айналды. Сазгер 50-ден астам драмалық қойылымға, 19 көркем фильмге, 17 мультипликациялық фильмге, 14 деректі-хроникалық фильмге музыка жазған. Осы жайындағы тың деректер «Қазақ сазының сайыпқыраны» тақырыбындағы арнайы жасақталған буклетте топтастырылған.

Тақырыптық әңгіме соңында электронды қазақ үйден Нұрғиса Тілендиевтің «Отырар сазы» оркестрінің орындауындағы «Ата толғауы» күйі тыңдалып, педагогикалық колледжінің студенті Аханова Әйгерім «Аққу күйін» орындап берді.