Халық күйлерінің тарихы: сазды сабақ
Абай атындағы әмбебап кітапханасының өнер бөлімінде «Үкілі домбыра» үйірмесінің аясында 2015 жылдың 10 ақпан күні «Халық күйлерінің тарихы» тақырыбында сазды сабақ өткізілді.
Іс-шара барысында бөлім қызметкерлері Қалматаев атындағы медициналық колледжінің студенттеріне халық күйлерінің шығу тарихы мен тәрбиелік мәні жайында маңызды ақпарттар берді. Күй – домбыраның үні мен жан дауысы болса, домбыра – қазақ халқының жан сезімі мен жан серігі. Адам жанының ішкі толқынысын таңғажайып үн, әуен, ырғақпен жеткізе білген қазақтың қоңыр домбырасы арқылы пайда болған күйлерді халқымыздың киелі мұрасы деуге болады. Аққудың сұңқылы, қаздың қаңқылы, бұлбұлдың сайрағаны, желдің гуілі, ат тұяғының дүбірі, қасқырдың ұлығаны бәрі – бәрі күй әлемінен тыс қалмаған. Сабақ барысында ерте дәуірден келе жатқан «Боз айғыр» күйі мен «Ақсақ құлан» күйлерінің шығу тарихы жайында қызықты мәліметтер келтіріліп, осы күйлер электронды қазақ үйден тыңдалды.
Сондай-ақ, «Күй көркем мәдениеттің қайнар көзі» атты көрме ұйымдастырылып, назарға ұсынылған кітаптар мен мерзімді басылымдардағы мәліметтерден шолу жасалып өтті. Осы іс-шараға қатысушы оқырмандарға бөлімдегі «Үкілі домбыра» үйірмесінің жұмыс бағыттары мен жылдық жоспарлары жайында ақпараттар беріліп, буклеттер таратылды.