Сұрапыл соғыстың жаңғырығы: бейнежазба
«Туған өлкенің тарихы мен жетістіктері» жобасы аясында өлкеміздің белгілі тұлғалары туралы мәліметтер мен ақпараттар қорын бір орталыққа жинақтау мақсатында, бұл жолғы кейіпкеріміз соғыс және еңбек ардагері Атамбай Оразбаевпен бейнесұхбат жазып алынды.
Атамбай ата 1941-1945 жылдары аралығында Мәскеу түбіндегі, Калинин, Украина, Польша, Брест камалы шайқастарынан сонау Берлинге дейінгі майдан жолдарынан өтіп талай қала, деревняларды жаудан тазартуға қатысқан. Әңгімеміздің кейіпкері Кеңес Одағының батыры Мәншүк Мәметовамен бірге соғысқанын мақтанышпен жеткізді. Талай оққа ұшқан боздақтардың ерлігін баяндады. Сұхбат барысында ағамыздың жолдасы Мәкен апа да еңбек майданындағы еңбектері туралы тереңнен толғап әңгімеледі. Атамбай атамыз 45 жылдан бері кітапхананың тұрақты оқырманы, әлі күнге дейін «Жұлдыз», Жалын» журналдарын, көркем әдебиетті сүйсініп оқиды. Біз 92-ге келген атамызға Ұлы жеңістің 70 жылдығына аман-сау жетіп, әлі де ғұмыр жасай беріңіз деген жүрекжарды тілегімізді жеткіздік.