Ілмек бізбен тоқу: шеберлік классы

Абай атындағы кітапхананың өнер бөлімі 19 ақпан күні «Шебер қолдар» үйірмесінің кезекті отырысында «Ілмек бізбен тоқу» кәсіби шеберлік класын ұйымдастырды.

Іс-шара барысында Сәрсенбина Ұлбар қазақтың қолөнері және ілмек бізбен тоқудың шартты белгілерімен жұмыс жасау жолдарына теориялық түрде дәріс беріп, ал қолөнер шебері Сұлтанова Сақан апа ілмек біздің қыр – сырын көрсете отыра, тәжірибе жүзінде өзіндік жұмыстар арқылы меңгеруіне көмектесті.

Ілмек бізбен тоқу барысына ілмектің болаттан, пластмассадан және ағаштан жасалынған түрлерін және олардың жіптің жуан-жіңішкелігіне сәйкес түрлі нөмерлері пайдаланылады. Ілмекпен тоқу үшін кез келген жіпті пайдалануға болады: жүннен, мақтадан иірілген, жібек жіптер, синтетикалық және аралас жіптер. Әдетте үстіге киетін киімдерді бостау иірген, ал дастарқан, салфетка, сумка сияқты заттарды ширақ иірілген жіппен тоқиды. Бөлшектерінің сыртқы пішіні үлгі мен есепке сәйкес шалуды (петель) қосу, яки қысқарту, сирек те жиі тоқу (ілмек пен жіптің диаметріне қарай) арқылы жасалады.

Сондай-ақ үйірме мүшелеріне бөлімдегі «Шебер қолдар» үйірмесінің жұмыс бағыттары мен жылдық жоспарлары жайында ақпараттар беріліп, буклеттер таратылды.