Ұраным – Алаш!: әдеби музыкалық кеш
2013 жылдың 16 мамырында Риддер қаласындағы «Шаңырақ» қазақ орта мектебінде Шығыс Қазақстан облыстық Абай атындағы әмбебап кітапханасының қызметкері осы кітапхананың 130 жылдық мерейтойына арналған «Ұраным – Алаш!» атты әдеби музыкалық кеш өткізді.
Өткізілген күні: 16 мамыр 2013 жыл. Өткізілетін орны: Риддер қаласындағы «Шаңырақ» қазақ орта мектебі. Қатысушылар саны: 60. Мақсаты: Семей қаласының Шығыс Қазақстан облыстық Абай атындағы әмбебап кітапханасының 130 жылдық мерейтойы туралы ақпарат беру. Күтілетін нәтиже: кітапхана қорындағы кітаптар мен мерзімді басылымдармен терең танысуын қамтамасыз ету.
2013 жылдың 16 мамырында Риддер қаласындағы «Шаңырақ» қазақ орта мектебінде Шығыс Қазақстан облыстық Абай атындағы әмбебап кітапханасының қызметкері осы кітапхананың 130 жылдық мерейтойына арналған «Ұраным – Алаш!» атты әдеби музыкалық кеш өткізді. Кеште кітапхананың кітап көрмесінің ашылуы болды, кітапхана бөлімдерінен қойылған кітаптарға түсінік беріліп, мектептің оқушылары мен ұстаздары кітапхана тарихынан мол мағлұматтар алды. Бүгінгі Абай атындағы әмбебап кітапхана қазақ өлкесіндегі тұңғыш кітапханалардың бірі. Семей қаласы 1782 жылы губерниялық қала статусын алса, осыдан жүз жыл өткенде, 1883 жылы тұңғыш қоғамдық кітапхана ашылған екен. Абайтанушы ғалым Қайым Мұхаметханов бұл туралы былай дейді: «Халық ағарту ісіне берілген алдыңғы қатарлы мәдениетті адамдардың ынта-жігерінің арқасында 1883 жылы Семей облыстық музейі мен қоғамдық кітапхана ашылды. Бұл мәдени-ағарту мекемелерін ұйымдастыруға негізгі ұйытқы болғандар, атақ-даңқ немесе бас пайдасы үшін емес, халық игілігі үшін қалтқысыз еңбек етуді адамгершілік борышым деп білген адал азаматтар еді. Олар орыстың саяси жер ауып келген интеллигенттері, Абайдың достары – Е.П. Михаэлис, А.А.Леонтьев, П.Д. Лобоновский, С.С. Гросс, Н.И. Долгополов тағы басқалар еді». Халық қамқоры болған осы зиялылар тобында Абайдың өзі де болып, кітапханамен тығыз қарым-қатынас жасағаны, 1883 жылы ашылған облыстық өлкетану мұражайына Долгополов екеуі елуден астам экспонат тапсырғаны тарихтан мәлім деді. Кештің жалғасында кітапхана көрмесіне қойылған әдістемелік көмекші құралдар мен қосымша таратылым материалдары оқушылар мен ұстаздарға таратылып берілді. Кеш соңында Құсмілия Нұрқасымның «Алаш көксілдері» деп аталатын өлеңдер циклынан жоғарғы класс оқушылары дайындаған өлеңдері оқылып, Семей Калалық Мәдениет сарайының әншілері Роллан Алпысбаев, Қуаныш Оралбаев, Біржан Әлікеевтер патриоттық тақырыптағы әндер орындады. Риддер қаласындағы «Шаңырақ» орта мектебінің директоры Сәуле Мәдиқызы Қайырханова Абай атындағы кітапхана мен Семей қалалық мәдениет сарайының ұжымына алғысхат тапсырды.