«Абай -170»: халықаралық флешмоб
Абайдың шығармашылық мұрасын насихаттау мақсатында «Аймақтық жобалауға инновациялық тәсілдер енгізу және халыққа әлеуметтік көмек көрсету арқылы бәсекелестікті арттыру» атты БҰҰ Бірлескен Бағдарламасы аясында БҰҰДБ-ң Семей қаласындағы өкілдігі «Абай -170» Халықаралық флешмобын жариялады.
2015 жылдың 11 маусымында біздің кітапханада БҰҰДБ-мен бірлескен, қазақтың ұлы ақын-ағартушысы Абай Құнанбайұлының 170- жылдығына арналған «Абай -170» Халықаралық флешмобының мәресі бастау алды.
Шараға қатысушылар «Абай оқыған әдебиеттер әлемі» кітап көрмесіне қойылған кітапхана қорындағы заманында Абай үшін ғылым-білім нәрімен сусындатқан сирек басылымдармен танысты.
Шара барысында Ұлы ақынға арналған ақын, өнертанушы Қ.Ж.Нұрқасымның төл туындысы «Абайға мұң» толғауы, Арқаның дәстүрлі ән мектебінің оқушысы Абзалова Дананың орындауындағы «Татьянаның хаты» әні, кітапханамыздың оқырманы Нығметжанов Дүйсенғазының орындауындағы «Ескендір» поэмасынан үзінді орындалды.
Кітапханадағы «Поэзия бұлағы» атты клубтың жас ақындары- Роллан Кеңесхан, Смайыл Ұлжалғас, №44,48 мектептің оқушылары Нұрмаш Назерке, Қалқаман Дінмұхамет, Жанбота Даленова, Сымбат Көшкінбаева, даярлық сыныбының оқушысы Сәкен Айханым және кітапханамыздың тұрақты оқырманы Бектасов Нүркен, ғалымдар М.Мұхамадиұлы, А.Омар, М.Сұлтанбеков Абайдың өлеңдерін, сонымен қатар өздерінің Абайға арнаған өлеңдерін қатысушылар назарына ұсынды.
Флешмобқа қала жұртшылығы, абайтанушылар, ақындар мен жазушылар, жастар мен балалар, сонымен қатар, Ұлы Абайдың поэзиясын сүйетін кітапхана пайдаланушылары қатысты.
Флешмоб барысында оқылған Абайға арналған авторлық шығармалар мен Абайдың өлеңдері байқауға қатысады.