Кітапханалар қызметі: тәжірибе және инновациялар: аймақтық семинар
2015 жылдың 12 маусымында біздің Абай атындағы кітапхана Шығыс Қазақстан облыстық А.С.Пушкин атындағы кітапханасымен бірлесіп, Абай Құнанбайұлының 170-жылдық мерейтойы қарсаңында Мемлекет басшысының Ұлт жоспары – бес институционалдық реформасын жүзеге асырудың 100 қадамы аясында Бесқарағай аудандық орталық кітапханасында «Кітапханалар қызметі: тәжірибе және инновациялар» атты біркүндік аймақтық семинар өткізді.
Семинарға Семей қалалық, Абай, Абыралы, Бесқарағай, Бородулиха аудандары ОКЖ-нің және Мұқыр ауылдық кітапханасының директорлары мен мамандары қатысты. Жиыны қатысушылар саны 42 адам болды.
Семинардың мақсаты: мемлекет басшысының бес институционалдық реформасын жүзеге асырудың 100 қадамы тәрізді мақсатты бағдарламаларды жасауға бағытталған ой-талқы ұйымдастыру, аймақтағы онлайн орталықтары мен кітапханалар ісінде мемлекеттік жобаны іске асырудағы іс қимылдар бағдарламасын жасау, өлкетану ресурстары бойынша инновациялық жобаларды енгізу, өлкетану жұмысы бойынша тәжірибе жинақтау, зерделеу және алмасу, өлкетану ақпараттарын таратудың механизмін құру.
Семинардың бірінші бөлімінде: А.С.Пушкин атындағы кітапхана директорының орынбасары Б.Ж. Шагиева «Бес институционалдық реформаны жүзеге асыру бағытындағы 100 нақты қадам» атты мемлекет басшысының мақсатты бағдарламасы бойынша баяндама жасап, маманы Р.С.Мязова 2014 жылғы жылдық есепке талдау, жетістіктер, инновациялар мен болашақ ұстанымдар жайлы интерактивті пікірталас ұйымдастырды.
Семинардың екінші бөлімінде: Абай атындағы кітапхана қызметкерлері З.Т.Мағауина және Ж.А.Манжибаева Ұлы Абайдың 170-жылдығына арналған «Ақын мерейтойы» тақырыбында библиокеруен өткізді. Библиокеруен барысында қатысушылар кітапхананың бай сирек басылымдар қорымен, ақынның музыкалық мұрасымен, Абай кітапханасы сайтында орналастырылған «Абай-170» айдарымен танысты. Шара соңында тақырыпқа орай слайд көрсетіліп, ақын, өнертанушы Қ.Ж.Нұрқасымның «Абайға арнау» толғауын және Абайдың әндерін орындаумен жалғасты.