Кітапхана қызметкерлері конференцияға қатысып қайтты
2015 жылдың 12 маусымында Абайдың мемлекеттік тарихи-мәдени және әдеби-мемориалдық «Жидебай-Бөрлі» қорық-мұражайы мен М.О.Әуезов атындағы Әдебиет және өнер институтының ұйымдастырумен Семей қаласында өткен, ұлы ақын, ойшыл Абай Құнанбайұлының туғанына 170 жылдығына арналған «Адамзаттың Абайы: әдеби мұрасы және абайтану мәселелері» атты халықаралық ғылыми-тәжрибелік конференцияға Абай атындағы кітапхана мамандары да қатысып қайтты.
Конференцияның пленарлық мәжілісінде еліміздің белгілі ғалымдары: академик, э.ғ.к. профессор О.Сәбден «Абай және қазақ болашағы», профессор А.Еспенбетов «Абай және қазіргі заман», профессор С.С. Қорабай «Абай поэзиясының ренессанстық сипаты», фил.ғ.д. А.Т.Хамраев «Ұйғыр әдебиетіндегі Абай әлемі» және Абай мұражайы директорының орынбасары М.Қайрамбаева «Абай мұрасын насихаттаудағы ұлы ақын мұражайының орны» атты баяндамалары тыңдалды. Абайдың әдеби мұрасы – халқымыздың ғасырлар бойғы маңызын жоймайтын рухани қазына. Конференцияның соңында ҚР Мемлекеттік сыйлығының иегері, ғалым Оразалы Сәбденнің «Абай және қазақ болашағы» атты кітабының тұсаукесер рәсімі өтіп, автор осы туындысын өз қолтаңбасымен кітапханамызға да сыйға тартты. Абай сөздерін негізге ала отырып жаңаша көзқараспен елінің бүгіні мен болашағы туралы ой түйіндеген ғалымға шығармашылық табыс тілейміз.