Абайдың рухани әлемі және кітапхана: мүмкіндігі шектеулі балаларға экскурсия

2015 жылдың 29 шілдесінде кемеңгер ақын есімін алып отырған кітапханамызда ұлы Абайдың 170 жылдық мерейтойы қарсаңында мүмкіндігі шектеулі балаларға арнайы экскурсия ұйымдастырылды.

Кітапхана табалдырығын алғаш аттағаннан ғажайып бір әлем- кітап патшалығына енген жас экскурсияға қатысушыларға бәрі де таңсық болды. Олар таңдана да, тамсанада оқу залы, абонемент бөлімдерінде болып, Абайдың мерейтойына арналған, балаларға арналған және Қазақ хандығының 550 жылдығына арналған кітап көрмелерімен, ондағы көз тартатын, көркем безендірілген альбом кітаптармен танысып, қолдарына алып, парақтап көріп, суреттерін тамашалап, кітаптардан тұратын қазына аралына тап болғандай әсерленді.

Балаларға әсіресе «Абайдың рухани орталығы», ондағы сирек кітаптар топтамалары ерекше әсер қалдырды. Шет тілдер бөлімінде балалар ағылшын тілінде мультфильм тамашалады, 1 топ мүгедегі Борыкбаев Саид кітапханаға жиі келіп, барлық қабаттарға көтерілу мүмкіндігі болғандықтан компьютерлік сауаттылық курсына, ағылшын тілін үйрету курсына қатыссам деген тілегін білдірді.

Кітапхананың барлық қабаттарына көтерілу АҚ НАК «Казатомпром» демеушілік көмегімен алынған мүгедектерге арналған көтеру құрылғысының көмегімен жүзеге асып отыр.