Абайды еске алғанда: абайтанушы, ҚР мәдениет қайраткері М.Қ. Жүнісовамен кездесу

2015 жылдың 29 шілдесінде кітапхананың «Абайдың рухани орталығында» ұлы Абайдың 170 жылдық мерейтойына арналған, кемеңгер ақын тұлғасын кеңінен таныту мақсатында өткен кездесу шарасында Абай мемориалдық музейінде ұзақ жылдар басшылық қызмет еткен Майкен Қазбекқызы мұражайдың ең алғаш ашылу, ұйымдастырылу сәтінен бастап тарихын тартымды баяндап берді.

Омбы, Мәскеу, Санкт Петербург сияқты ірі мәдениет орталықтарында және өз еліміздің архив, музей, кітапхана сияқты мәдени мекемелерінен инемен құдық қазғандай Абайға қатысты ақпараттар мен жәдігерлерді тірнектеп жинап, музей қорының құнды мәліметтермен, бағалы экспозициялармен толығуына ықпал еткен Майкен Қазбекқызы жиналған қауымға өзі көрген, жақын қарым-қатынаста болған Абай ұрпақтарының баспа бетінде айтыла бермейтін ерекше бір тартымды қасиеттері, бекзат болмыстарын әдемі сипаттады.

Шара қонағы, «Абайдан соң», «Абай еліне саяхат» кітаптарының авторы Камен Оразалиннің қызы Зере Каменқызы өзінің шығармашылық ізденісте, «Нұрлы тамшылар» кітабын жазуда екенін ортаға салып, әлі жарық көрмеген туындысынан бірнеше үзінді оқып берді. Зере Каменқызының көркем туындысында көпшілігімізге таныс өлкенің әдебиет, мәдениет, өнер тұлғаларының таныс бейнелері сомдалған.

Кездесу шарасының келесі бір қонағы, кітапхананың тұрақты оқырманы Ғалым Оразбекұлы: «Абай тұлғасын толық танып, білу мүмкін емес, ақын өзі жазғандай, жұмбақ жан. Мен Абайды тану жолындамын. Жандүниемді байытатын, ерекше рух алатын Абай мұрасымен қауышқан сайын өзімді бақытты сезінемін!»-деп ағынан жарылып, Абай өлеңінен үзінді оқып берді. Шараға қатысушылар «Рухани қазына- ғасырдан ғасырға» сирек басылымдар көрмесімен танысты.