Тарбағатайдың таңбалы тастары: деректі фильмнің тұсаукесері

2015 жылдың 19 қарашасында Шығыс Қазақстан облыстық Абай атындағы әмбебап кітапханасында Қазақ хандығының 550 жылдығына орай ұйымдастырылған ғылыми экспедиция зерттеушілері түсірген «Тарбағатайдың таңбалы тастары» атты деректі фильмнің тұсаукесері өтті.

Тарбағатай – Барқытбел тауының Үржар ауылы тұсындағы Ақберлі биігінде әлемдік мәдени қазына қатарына қосылуға лайық тастағы ғажайып суреттер – археологиялық ескерткіштер туралы құнды деректер осы фильмнің жарыққа шығуына негіз болды.

Экспедициялық жобаның жетекшісі және деректі фильмнің сценарийін жазған – Қазақстан Республикасының білім беру ісінің үздігі, Ы.Алтынсарин медалінің иегері, Үржар ауданының құрметті азаматы, ақын, мәдениеттанушы, кітапхана қызметкері Құсмілия Жырғалұлы Нұрқасым. Ғылыми экспедиция мүшелері: Шәкәрім СМУ-нің профессоры, тарихшы-ғалым, археолог Амантай Исин, Үржар аудандық өлкетану музейінің директоры Серікбек Туғанов, этнограф –мүсінші Оразамбай Бекбаев, сазгер Ахметхан Алпысбаев, тарихшы Едіге Жырғал және Қазақстан-Семей телекомпаниясының операторы Бауыржан Жолдыбалин.

Туған жеріміздің тарихы мен тұлғалары туралы мазмұны терең ақпараттарды жергілікті зерттеушілерден артық ешкім жаза алмайтыны шындық, сондықтан, деректі фильм біздің кітапхана құрған «Туған өлкенің тарихы мен жетістіктері» бағдарламасы аясында өлкетану қорын толықтырумен бірге оқырмандарымызды, келешек ұрпақты туған елге деген сүйіспеншілігін арттыруда маңызы зор мәдени мұра болды. Кітапхана директоры Г.Т.Жігітбаева экспедиция мүшелерінің қиын да жауапты еңбектері үшін алғыс хатпен марапаттады.

Шараға қатысқан өлкетанушылар, ғалымдар, мәдени мекеме қызметкерлері, кітапханашылар және ҚазГИЗУ-нің студенттері, геодезия-картографиялық колледж ұстаздары мен студенттері туған жердің ғажайып құпия сырларымен танысқандарына ризашылықтарын білдіріп, соңынан экспедиция мүшелерімен ескерткіш суретке түсті.