Елбасы Жолдауындағы әлеуметтік саясат: әлеуметтік лекторий
2015 жылдың 11 желтоқсанында Абай атындағы кітапхана қызметкерлері Семей қ. Қарттар мен мүгедектерге арналған жалпы үлгідегі медициналық-әлеуметтік мекемесінде «Елбасы Жолдауындағы әлеуметтік саясат» деген тақырыпта әлеуметтік лекторий ұйымдастырды.
Тыңдаушылар назарына 2015 жылдың 30 қарашасында Елбасының Қазақстан халқына Жолдауында көрсетілген дағдарысқа қарсы бағдарламасының барлық бағыттары кесте түрінде берілген слайд көрсетілімдер ұсынылды. Бұл Жолдаудың әлеуметтік саясат бөлімі қатысушылардың қызығушылығын тудырды. Бөлімде мемлекет экономикалық тәуекелдерге қарамастан халықты әлеуметтік қолдау шараларын жалғастырылатыны жарияланды. Ол дегеніміз келесі жылы әлеуметтік жәрдемақылар, еңбекақылар мен зейнетақылар мөлшері артады.
Сонымен қатар шара барысында «Денсаулық» бағдарламасы туралы ақпарат берілді. Бұл бағдарлама бойынша 2016-2020 жылдарға отбасылық медицина қағидаларын, міндетті әлеуметтік медициналық сақтандыру жүйесін және қаржыландырудың үлгілерін енгізуді қарастырады. Қарттар үйінің тәрбиеленушілері белсенді түрде әлеуметтік сала бойынша сұрақтар қойып, өз пікірлерін білдіріп отырды.
Сондай-ақ кездесу аясында мүмкіндігі шектеулі азаматтардың құқығын қорғау мәселесі қарастырылды. Мүгедек жандардың құқығын қорғауға республикалық бюджеттен 9,9 млрд. теңге бөлінді. Осы сұраққа қатысты кітапхана қызметкерлері жаңа заңдар мен мемлекеттің әлеуметтік қолдау шараларын баяндады.