Арғынбек Ахметжанов – абайтанушы, халық композиторы: бұрыштың тұсаукесері
Абай атындағы әмбебап кітапхананың өнер бөлімінде 2016 жылы 17 ақпан күні «Өнер өлкесінде» клубының аясында, Абай һакімнің 45-тен астам өлеңіне ән-романстар жазған абайтанушы, сазгер, қолөнер шебері Арғынбек Ахметжановтың өмірі мен шығармашылығына арналған «Арғынбек Ахметжанов – абайтанушы, халық композиторы» атты бұрыштың тұсаукесері ұйымдастырылды.
Бұрыштың ашылу рәсіміне қаламыздың көрнекті адамдары Нұрмұхамед атындағы мешіттің бас имамы Алдаберген қажы, абайтанушы – ғалым М. Р. Сұлтанбеков, еңбек ардагері Ғ. У. Даутов, сазгердің шәкірті, ақын – журналист М.Алин, және сазгердің әндерін дәріптеп жүрген музыкалық колледжінің оқытушысы, әнші А. Смасеитова сынды сазгердің замандас достары, және М.Әуезов атындағы педагогикалық колледждің студенттері қатысты.
Үш бөлімнен тұратын бұрышқа сазгердің әр жылдардағы өмірі мен шығармашылығында кездескен ұстаздарының, әнші – сазгерлердің фото – шежірелері, Абай мен Шәкәрімнің ән, дастан мұраларын қамтитын «Рухани жол» атты 4-томдық шығармалары, автордың ән романстары, мерзімді басылым беттерінде жарияланған сазгер жайында мақалалар топтамалары, шебердің қолынан шыққан музыкалық аспаптары қойылды.
А. Ахметжановтың Абай өлеңіне шығарған романстары кеш барысында әншілер А.Смасеитова мен Д.Ағзамованың орындауында шырқалып, қатысушылар қошеметіне бөленді. М.О.Әуезов атындағы педагогикалық колледжінің студенті Т.Шерікбайқызының орындауында Абай атамызға арнауы тарту етілді.
Іс–шара өзінің танымдық тартымдылығымен, рухани құнылығымен қатысушылар жүрегінен жол таба білді.