Біздің күшіміз достық пен бірлікте: достық кеші

1 наурыз күні Абай атындағы кітапхана қызметкерлері 1 наурыз-Алғыс айту күніне арналған «Біздің күшіміз достық пен бірлікте» тақырыбында алғаш рет көктемнің бірінші күні достық кешін ұйымдастырды.

Қазақ, татар, неміс және орыс өкілдерінен құралған кітапхана ұжымы бүгінгі мерекемен бір-бірін құттықтап, ұлттық тағамдарын әзірлеп дастархан жайды.

Мерекенің тарихына үңілетін болсақ, Сталин режимінде әр жылдары, халықтар түгелдей жер аударылып, әр жылдарда бүтіндей бір халықтар – 800 мыңға жуық неміс, 102 мың поляк, 550 мың Солтүстік Кавказ халықтарының өкілдері, 18,5 мың Қиыр Шығыстағы корей отбасылары қоныс аударған болатын. Сол уақытта бұл далада өздері мұқтаж бола отырып, оларды саман үйлеріне қабылдап, өздері жеп отырған жарты нанның жартысын бөліп беріп, өз шаңырағының астына біріктіріп, қанатымен су сепкен қарлығаштай, қамқорлығына алған қазақ отбасылары болатын.

Бұл мерекенің тарихилығын, маңыздылығын түсініп, шараға қатысушылар бір-біріне шын жүректен шыққан алғыстарын білдірді. Мерекеге «Возраждение» неміс қоғамдық бірлестігінің «Айнхайт» бишілер тобы «Полька» биін билеп, мерекелік көңіл күй сыйлап, ұжым арасында шеберлік классын көрсетті.