Бекен Имахановтың дара жолы: ток-шоу

24 қаңтар күні Абай атындағы әмбебап кітапханада Семейдің Абай атындағы музыкалық-драма театрының актеры, Қазақ ССР-інің халық әртісі Бекен Имахановтың өмірі мен шығармашылығына арналған «Бекен Имахановтың дара жолы» атты ток-шоу өтті.
Ток-шоу көрермендері актердің қызметтестері, Абай атындағы музыкалық-драма театрының актерлары, қаламыздың зиялы қауым, қызмет көрсету саласы колледжі мен Олимпиядалық резервінің аймақтық колледжі және Шәкәрім атындағы мемлекеттік университетінің студенттері, кітапхана пайдаланушылары қатысты. Кеш қонақтары ҚР мәдениет қайраткері Әшімбеков Сапарбек, Сыдық Мырзахан актердің шығармашылық жолынан естеліктер айтып, Қазақстанның халық әртісі, тума талант, дарын иесі Бекен Имаханов туралы өздерінің жүрекжарды лебіздерін білдірді.
Театр абызы, өнердің анасы Күләш Сакиеваның Бекен ағамызға арнаған естеліктерінен бейне түсірілім арқылы естеліктері мен тілек баталары көрсетілді. Театр актері Бекзат Омашев «Махаббатты өмірге» деген әнімен шәшу шашты.
Жазушы Молдабек Жанболатов ағамыз қазақ театрының алғашқы шымылдығын ашқан Мұхтар Әуезовтың «Еңлік – Кебек» спектаклі, Семей театрының тарихы мен Бекен ағамыздың ойнаған ролдері жайында әңгімелеп берді.
Шара барысында актер ойнайтын спектакльдерден үзінділер қойылып, әріптесерінің актер туралы лебіздері экран арқылы көрсетіліп, «Естен кетпес естеліктер» атты кітабының таныстырылымы болады. Бекен Имахановтың актерлік шеберлігінің толысқан шағында, сахна төрінде сомдалған «Абайдағы» (М.Әуезов) – Абай, «Шәкәрімдегі» (М.Ибраев) – Шәкәрім, «Жаза-Назадағы» (Т.Ибрагимов) – Құнанбай бейнелері қазақ театр өнеріндегі қайталанбас, дара тұлғалар. Орда бұзар отызында «Қазақ ССР-нің еңбек сіңірген әртісі, ал қамал бұзған қырқында «Қазақ ССР-інің халық әртісі» атағы, екі мәрте Қазақ ССР Жоғары кеңесінің құрмет грамотасымен, «Ерен еңбегі» медалімен марапатталған. Қазақ Кеңес, Шығыс жұлдыздары және Шәкәрім энциклопедияларында есімі жазылған. Бүгінде 80-нің сеңгіріне шығып отырған абыз қария Абай атындағы музыкалық-драма театрында еңбек етіп, қазақ өнері мен мәдениетіне қызмет етуде.
Актермен бетпе-бет жүздескен көрермен қауымның, өнер иесіне қойған сұрақтарының көбі актер шығармашылығына және өмір жолына байланысты болды. Кешке арнайы «Театр – менің өмірімде…» атты кең көлемді кітап көрмесі ұйымдастырылып, шолу жасалындды. Кітап көрмесінде Бекен Имахановтың өмірі мен шығармашылығы туралы жазылған кітапхана қорындағы кітаптар, мерзімді басылым беттерінде жарық көрген және актер туралы жазылған мақалалар мен фотосуреттер қойылды.
Бекен Имахановтың мерейлі мерейтойымен шын жүректен құттықтап, шығармашылық табыстар тілейміз!