Ғалым Тұрдықұл Шаңбайдың «Лев Гумилев» тұлғалық энциклопедиясы: тұсаукесер

2017 жылдың 17 ақпаны күні кітапханамызда «Тәуелсіз Қазақстанның жетістіктері» жобасы аясында энциклопедияшы ғалым, филология ғылымдарының кандидаты, профессор, Қазақстан Республикасының мәдениет қайраткері, Қазақстан Республикасы білім беру ісінің құрметті қызметкері, Тарих және қоғамдық ғылымдар Академиясының академигі, Қазақстан биобайлығын сақтау Ассоциациясының мүшесі, қаламыздағы Қазақ Инновациялық Гуманитарлық-заң университетіндегі «Алаштану» ғылыми зерттеу орталығының директоры Тұрдықұл Қасенұлы Шаңбайдың «Лев Гумилев» тұлғалық энциклопедиясының тұсаукесер салтанаты өтті. Орыс тілінде тұңғыш рет 2013 жылы Мәскеудің «Художественная литература» баспасынан жария көрген энциклопедия өткен жылы Ресей Тіл ғылымы Академиясының академигі, аталған баспа директорының қолымен «Жылдың ең үздік энциклопедиялық жобасы» номинациясын жеңіп алған және «Лев Гумилев» медалімен марапатталған. Тұсаукесер шарасына қатысқан зиялы қауым өкілдері мен студенттерге әр түрлі ғылым саласынан 29 энциклопедия, 1000- нан аса ғылыми мақалаларының авторы ғалым Т.Қасенұлының бай ғылыми еңбектерінен кітап көрмесімен танысты. Еуразия кеңістігінің айтулы ғалымы Л.Гумилевке арналған слайд пен ғалымның ғылыми-зерттеу саяхаттарынан сирек кездесетін қызықты фото суреттер көрсетілімі шара мазмұнын аша түсті. Шараға қатысқан ғалымдар Каримов М.Қ., Иманжапаров М.Т., Кенемолдин М.М. және басқалары энциклопедияның құндылығына, Қазақстан ғылымының үлкен жетістігі екенін ортаға салды.