Наурыз – құт береке мейрамы: ұлттық ойын сабағы

30 наурыз күні Абай атындағы кітапханада жас жеткіншектерге наурыз мейрамына орай «Наурыз – құт береке мейрамы!» атты ұлттық ойын бағдарламасы өткізілді.

Қазақ халқының салт-дәстүрінде ұлттық ойындардың орны ерекше. Ертеден келе жатқан ұлттық ойындарымыз бір кезде ұмыт болып, кейінгі жылдары қайта жаңғырып, ел арасында кеңінен таралып жүр. Ұлттық ойындарымыздың тәрбиелік мәні, оған қосымша рухани байлық пен денсаулық үшін пайдасы орасан зор. Соған байланысты оларды ата – бабаларымыз бірнеше топтарға жіктеген.

Кеш барысында наурыз мерекесінің көнеден келе жатқан тарихымен және халқымыздың аса құнды мәдени игіліктерінің бірі ұлттық ойындардың мәні мен мағынасы жайлы ақпарат берілді. Балаларға асық ойынының бірнеше түрлері ұсынылды. Қатысушылар бірнеше топқа бөлініп, «Бес табан» ойынын ойнады.

Жеткіншектер қазақ халқының ұлттық ойындарының бірі күш пен шыдамдылықты тексеретін «Арқан тарту», «Бұқа тартыс» атты ойындарына қатысып, күш сынасты. Сонымен бірге логикалық ойлау қабілетін және төзімділігін дамыту мақсатында ойшылдар ойыны тоғызқұмалақ ойнады. Балалар наурыз жайында өлеңдер оқып, «Қара жорға» биін барлық қөрермендермен бірге биледі.

Шара соңында белсенді қатысқан ойыншыларға сыйлықтар беріліп, асық ойынының болашағы туралы «Әли мен Айя» атты мультипликациялық фильм көрсетілді. Балалар арнайы дайындалған ұлттық тағамдардан дәм тартып, ризашылықтарын білдірді.

Наурыз құтты болсын! Ақ мол болсын! Ұлыс оң болсын!