Адольф Янушкевичтің ізімен: кітаптың тұсаукесері

14 қыркүйек Абай атындағы кітапханада кітапханамыздың тұрақты оқырманы, ҚР Журналистер Одағының мүшесі, запастағы полковник Шаймардан Ахмарұлы Қалиақпаровтың  «Адольф Янушкевичтің ізімен» атты  кітабының тұсаукесері  өтті.

Сібірге жер аударылып тағдыр тәлкегімен қазақ даласына тап болып, қазақ тілін меңгеріп, халық ауыз әдебиеті нұсқаларын жинаған, ұлтымыздың рухани мәдениетіне тәнті болып әйгілі «Қазақ даласына саяхатының күнделіктері мен хаттарын» жариялаған поляк халқының  айтулы ұлы Адольф Янушкевичтің өлкемізде басып өткен ізімен саяхат жасап, сол тарихи кезеңді деректі құжаттармен терең зерттеу нәтижесінде  Шаймардан Ахмарұлының «Адольф Янушкевичтің ізімен» атты  кітабы дүниеге келген.

Жоғары санаттағы әскери маман Шаймардан Ахмарұлының қаламынан туған 250-дей публицистика, 15 кітабына арқау болған басты тақырып та ұлтымыздың тарихы, өлке тарихы, мәдениеті,  ұлтымыздың мақтанышы – батырлары мен бағлан ұлдары, өнер дүлдүлдері, ауылдың қарапайым еңбек адамдары мен ерекше жаратылған тұлғалар, яғни арқауы үзілмеген ұлттық  салт-дәстүріміз.

Шара барысында зиялы қауым өкілдері, Польша елінің азаматшасы Швейцарияның Сент Галлен университетінің жас ғалымы  «Поляк саяси жер аударылғандары қазақ жерінде» тақырыбында жазылған  ғылыми еңбектің  авторы    Карина Гайбуллина мен Шаймардан Ахмарұлының әріптесі Александр Владимирович Коновалов қаламгердің жазушы ретіндегі жетістіктері мен шығармашылығы жайлы пікірлерін білдірді. «Қаламын өміріне серік еткен» атты кітап көрмесі ұйымдастырылып, оған жазушының өмірі мен шығармашылығы туралы кітаптар қойылып, шолу жасалды.