Ұлы даланың ұлы жазушысы: кең көлемді кітап көрмесі
Қазан айының 5-6-шы жұлдызы күндері М.О. Әуезовтің туғанына 120 жыл толуына орай М.О. Әуезов атындағы педагогикалық колледжінде Мұрат Әуезовтың қатысуымен «М.О.Әуезов мұрасы: рухани жаңғыру» тақырыбында ғылыми тәжірибелік конференция өтті. Аталмыш шараға біздің кітапхана «Ұлы даланың ұлы жазушысы» атты кең көлемді кітап көрмесін ұйымдастырды. Көрмеге М.О. Әуезовтің Б.Кенжебаевпен бірлесіп 1945 жылы ұстазы Абайға арнаған «Абай – великий казахский поэт» атты ең көне кітабы ұсынылып, жазушының әр жылдары жарық көрген 100-ден аса кітаптары мен естеліктері, мерізімді басылымдары қойылды.
2014 жылы баспадан шыққан М.О.Әуезовтің 50 томдық шығармалар жинағына, мұрағат құжаттарынан жинақталған «Неизвестный Ауэзов» (құрастырушы Р.Абдигулов) және «Неизвестное в наследии М.Ауэзова» (құрастырушы Р.К.Койшибаева) кітаптарына қатысушылар ерекше қызығушылық танытты. Сонымен қатар конференцияға қатысушылар сирек басылымдар қорынан алынған М.О. Әуезовтің 1957 жылы өзбек тіліне, 2014 жылы неміс тіліне аударылған «Путь Абая» кітабы және басқа тілдердегі кітаптарына ерекше ықылас білдірді.
