«Шарль Перроның таңғажайып ертегі әлемі»: сахналық көрініс

17 қаңтар күні Абай атындағы кітапхана қызметкерлері француз жазушысы Шарль Перроның туғанына 390 жыл толуына орай №8 балалар үйінде «Шарль Перроның таңғажайып ертегі әлемі» тақырыбында мәдени шара өткізіп қайтты. «Ұйқыдағы ару» атты тұңғыш ертегісі 1696 жылы «Mercure Galant» журналында жарық көріп, кейін «Ана қаздың ертегілері», «Қызыл телпек», «Күлбикеш», т.б. ертегілерімен бүкіл әлемге танылған француз жазушысы Шарль Перро қазақ оқырмандарына да жақсы таныс. Шарль Перроның «Бармақтай бала», «Етік киген мысық», «Тұлымды Рике», «Үш торай», «Қызыл телпек», «Күлбикеш», «Ұйқыдағы ару» т.б. ертегілерін әрбір оқырман сүйсіне оқиды. Танымал жазушының өмірі мен шығармашылығын жас оқырмандарға таныстыру мақсатында ұйымдастырылған шара барысыныда ертегіден үзінді қойылымы, кітап көрмесі, слайдтық көрсетілім ұсынылып, викториналық ойындар ойнатылды.

Балалар әдебиеті бөлімінің қызметкерлері мен кітапханада тәжіриебеден өтіп жүрген Семей көпсалалы колледжінің студенттерінің орындауында Шарль Перроның әлем жұршылығын тамсандырған ең ғажайып ертегілерінің бірі «Қызыл телпек» ертегісінің желісі бойынша сахналанған шағын көрініс көрсетті. Көрініс соңында Қызыл Телпек кейіпкері балаларға тәтті таратып тамаша көңіл-күй сыйлады.

«Сиқырлы ертегілер» атты кітап көрмесіне әлем балалар әдебиеті сериясынан шыққан Шарль Перроның ертегілер жинағы, «Қызыл телпек», «Етік киген мысық», «Күлбикеш», «Ұйқыдағы ару», «Сказки», ашылмалы суреті «Кот в сапогах», «Зарубежные сказки», «Неворятные истории» т.б. кітаптар қойылып, шолу жасалынды.