Сахараның дана ойшылы: ақпараттық сағат

19 қаңтар күні Абай атындағы кітапхананың оқу залында ұлы Абайдың мұраттас мұрагер шәкірті, ғұлама ойшыл, тарихшы, аудармашы, сазгер Шәкәрім Құдайбердіұлының 160 жылдығына орай, кітапхана қорындағы оның өмірін, мұраларын жасөспірімдер арасында терең білуге ынталандыру мақсатында «Сахараның дана ойшылы» атты ақпараттық сағат оқырмандар назарына ұсынылды.

Шәкәрім Құдайбердіұлы – Абайдай ұлы ұстазынан тәлім-тәрбие алып, қазақ әдебиетінің дамуына зор үлес қосқан ақын.Қазақтың түбі қайдан шыққанын ғылыми дәлелдеп, тарихи деректерді негіз еткен тұңғыш «Түрік, қырғыз-қазақ һәм хандар» шежіресін жазды. Еліміз егемендік алғаннан кейін Шәкәрімнің ақындық мұрасын зерттеуге мол мүмкіншілік, жол ашылды.

Шара барысында кітапхананың байырғы оқырманы Әлібаев Алдаберген ақсақал Шәкәрім қажы туралы өз ойын ортаға салса, көпсалалы колледждің студенті Болатова Инабат Шәкәрім қажының философиялық, поэтикалық көзқарастары жайында қызықты баяндап, осы колледж студенті Тыныбаева Арманай «Қазақ» атты өлеңін нақышына келтіре мәнерлеп оқып, шараның шырайын кіргізді.

Шара соңында тыңдаушыларға Шәкәрім шығармалары мен ақын жайлы деректер жайында мультимедиялық слайд ұсынылды және Шәкәрім әндерін бірден бір насихаттаушы, әнші марқұм Келденбай Өлмесековтың орындауында «Бұл ән бұрынғы әннен өзгерек» әнін аудиожазбадан тыңдалып, ақынның өмір жолы, даналығы, дүниетанымдылығы туралы арнайы қойылған кітап көрмесінен мол мәлімет берілді.

Оқырмандар тағылымы мол, маңызды әрі күрделі өмір жолынан сыр шертетін ақынның өмірдерек «Мұтылғанның өмірі», Омаров Асанның «Шәкәрімнің өмірбаяны», Үзтілеуова С. «Шәкәрімнің сөз әлемі» және Сыдықов Е. «Шәкәрім және Алашорда» т.б. шығармаларына аса назар аударып, қызығушылық танытты.