Өлкетану қонақжайы

  • 19.03.2018

Наурыз айының 18-де Абай атындағы кітапханада «Рухани жаңғыру» бағдарламасы аясында өткен «Өлкетану қонақжайы» қазақ даласына еуропалықтардың жасаған саяхатына арналды. Шараны кітапханамен бірлесіп «Прииртышье» өлкетану қоғамы мен «Туған қалам» қоғамдық қоры ұйымдастырды.

Еуразияның ежелгі заманнан дамыған өркениеті мен табиғатының құпиясы осы жұмбақ, ғажайып өлкеге еуропалық саяхатшылардың қызығушылығын арттыра түскен.  Шығыс Қазақстан өлкесін, оның табиғат байлығы мен этнографиясын зерттеуде  немістің Бремен қаласының тұрғыны Альфред Брем мен қазақ даласында жеті жыл, жеті ай уақытын зерттеумен өткізген ағылшын Томас Аткинсон болатын. Өлкетану қонақжайының қатысушыларына «Альфред Бремнің» өзі келіп, біздің қалаға жасаған саяхаты жайлы әңгімелеп берді. Әйгілі ғалым А.Бремнің бейнесін өлкетанушы  Александр Зязин сомдады. Өлкетанушылар шара қонақтарына саяхатшылардың өмірі мен қызықты оқиғалары жайлы әңгімелеп берді. Тыңдармандар батыл саяхатшы, Семейде ері  В.А. Полторацкий губернатор болған он жылда  аралаған жерлерінің тарихи бейнелерін жасаған өлкеміздегі тұңғыш фото-суретші әйел – Л.К. Полторацкая түсірген өте сирек кездесетін фото суреттермен танысты. Бір жарым ғасыр бұрынғы қазақ өмірінен мәлімет берер аса құнды тарихи өлкетану фото-суреттерін  Л.К. Полторацкая 1870 жылдары жасаған. Қаламыздағы өлкетану мұражайының қызметкері 18-19 ғасырда өлкемізде, қаламызда болған еуропалық саяхатшылар жайлы шолу жасады. Шараға арнап кітапхана қызметкерлері «жаратылыстану саласынан сирек кітаптар» және «Еуразия жайлы саяхатшылардың, ғалымдардың зерттеулері» атты бөлімдерден тұратын көрме ұйымдастырылды. А.Бремнің көзі тірісінде жария көрген неміс тіліндегі  «Жизнь животных» кітабының сирек түпнұсқасы қатысушылар назарын өзіне аударды. Шараны А.Брем мен Т.Аткинсон жайлы фильмдерден қызықты үзінді толықтырды.

Шара қонақтарына қазақ халқының тұрмысынан этнографиялық понарама жасалып, Ертіс өңірінің жануарлар әлемінен көрме қойылды. Көрмеге қойылған этнографиялық экспонаттарды Өлкетану мұражайы мен  Агротехникалық колледж ұсынған.