Бірге жарқыраймыз!: экологиялық акция
19 мамыр күні Абай кітапханасы республикалық экологиялық акция аясында «Жанұя орталығы» ҚҚ бірге қаламыздағы №31 және №16 ЖББ мектептің оқушыларымен «Бірге жарқыраймыз!» атты эко-фестиваль ұйымдастырып өткізді. Акцияның негізгі бағыты оқушылардың экологиялық білімін, экологиялық мәдениетін, экологиялық тәрбиесін дамыту.
Акцияға қатысушыларды «Адамзат ертеңі – жасыл энергия» тақырыбындағы кең көлемді кітап көрмесі мен қаламыздағы мектеп оқушыларының қолымен дайындалған қолөнер бұйымдарының көрмесі қарсы алды.
Акция шеңберінде мектеп оқушылары түрлі экологиялық алаңдарда өздерінің интеллектуалдық және шығармашылық мүмкіндіктерін түрлі бағыттарда көрсету мүмкіндігіне ие болды.
Бірінші алаңда «Экология, Қазақстанның флорасы мен фаунасы», «Жасыл энергетика – болашақтың энергиясы», «Қызыл кітап беттерінен…», «Ядролық қарусыз әлем үшін» атты төрт бөлімнен тұратын «Экологиялық ассорти» атты көрме-викторина жасақталды. Аталмыш көрменің әр бөліміне сұрақтар дайындалып, оқушылар осы сұрақтарға жауап берді.
Екінші алаң «Эколото» интеллектуалдық ойынына арналып, оқушылар берілген сөздерден мақал-мәтел құрастырып, энергияны үнемдеу тақырыбында жұбақтар шешіп, «Жер бетінде қоқыстар қанша өмір сүреді?» тақырыбында ұсынылған жауаптардың ішінен дұрысын таңдап жауап берді.
Мереке аясында үшінші алаңда «Табиғат балалар көзімен» атты сурет байқауы өткізілді. Байқауда «Сыйқырлы қылқалам» үйірмесінің мүшелері ерекше белсенділік танытты. Салған суреттерінде балалар көлдердің, өзендердің, ормандардың, ауаның тазалығын сақтауға шақыратын әр түрлі үндеулерді бейнеледі. Сурет байқауының қорытындысы бойынша: Муратбеков Алан, Шишков Дима, Кадырова Айсана, Максутканова Аружан, Максутканов Темирлан, Бадриев Роман, Ильин Эрик жеңімпаз деп танылып, естелік сыйлықтарға ие болды.
Сайысқа қатысушылар әрбір дұрыс жауаптары үшін жетондар алып, олардың саны бойынша жеңімпаздар анықталды. Барлық сайыстың қорытындысы бойынша көп жетон жинап жеңіс тұғырына Панина Альбина, Қадырмолды Нұрсұлтан, Агатанова Рахия, Қалқабаева Анель, Махатов Даниал, Оразбаева Раушан және т.б. көтеріліп, «Жанұя» ҚҚ ұсынған сыйлықтарға ие болды.
«Бірге жарқыраймыз!» экологиялық акциясына қатысқан жас өркендер туған елінің экологиялық жағдайы мен мәселесі туралы мол ақпаратқа қанығып, көтеріңкі көңіл-күймен тарқасты.
