Кітап экспозициясы

21 қыркүйек күні Абай кітапханасы «Рухани жаңғыру» бағдарламасының аясында Мұхтар Әуезов атындағы педагогикалық колледжінің 115 жылдық мерейтойына арналған Халықаралық семинар-практикумына «Шежірелі ұлағат ордасы» және «Абай әлемі» жобасымен жарық көрген жаңа кітаптар топтамасынан кітап көрмесін ұйымдастырып, шараға қатысушылардың назарына ұсынды.

Көрмеге Қазақстанның алғашқы арнаулы оқу орны, Алаш зиялылары білім алған әйгілі Семейдің мұғалімдер семинариясының тарихы, ұстаздары мен әйгілі түлектері жайлы  дереккөздер болып табылатын өлкетану қорынан Облыстық Статистикалық Комитеттің басылымдары, Географиялық Қоғамның Семей Бөлімшесінін «Записки» сынды әдебиеттер кеңінен қойылды.

Ұлт зиялылары Әбікей Сәтбаев, Сейітбаттал Мұстафин, өлкетанушы Н.Я.Коншин, Н.Құлжанов, Н.Құлжанова, ағайынды Белослюдовтар ұстаздық еткен білім ордасынан М.Әуезов, Қ.Сәтбаев, Ж.Аймауытов, Ш.Айманов, Ә.Марғұлан, Ә.Нұршайықов, Ш.Қабылбаев, М.Ақынжанов, Т.Шойынбеков, М.Бөжеев сынды ұлт зиялылары түлеп ұшқан. Көрменің «Әйгілі түлектер ұясы» бөлімі білім ордасынан буындары бекіп, өмірге жолдама алған әйгілі түлектері мен ұстаздарының сирек қорда сақталған еңбектері мен олар жайлы бағалы дереккөздермен таныстырады.

Шара қонақтары бес жылға жоспарланған  «Абай әлемі» кітаптар сериясымен күні кеше ғана баспадан шығып, сиясы кеппеген, әлем әдебиетінің үш бірдей алыбы Абай, Шәкәрім, Мұхтардың шығармалары мен халық ақыны Абайдың шәкірті Төлеу Көбдіковтың туындылары, Марат Қабанбаевтың балаларға арналған повестері мен әңгімелері,  орыс жазушысы Федор Достоевскийдің Семей қаласында өмір сүрген кезеңінде жазылған еңбектері мен әнші Әміре Қашаубаев жайлы деректі хикаяттар, естеліктер, сондай-ақ, өлкемізден шыққан танымал талант иелерінің шығармаларымен танысу мүмкіндігіне ие болды.