Шығыстың ақ Баяны: бенефис-сазды кеш

02 сәуірде Абай атындағы әмбебап кітапханасының өнер бөлімінде «Өнер өлкесінде» сазды қонақжай клубының аясында, осы үйірменің жетекшісі, бүкілодақтық Ленин комсомолы сыйлығының лауреаты, әнші, әртіс, ҚР Еңбек сіңірген қайраткері Баян Сағынбаеваның 65 жылдық мерейтойына орай «Шығыстың ақ Баяны» атты бенефис-сазды кеш өтті.

Баян Сағынбаева 15 жасынан жазушы М.Әуезовтің «Қаракөзіндегі» күрделі бейне Қаракөзді сомдады. Жұртшылыққа да танылуы осы рөльден басталды. 1967 жылы Мәскеуге барып Кремль сахнасында Б.Майлиннің «Жалбыр» музыкалық драмасын қойды. 16 республиканың 32 халық театры қатысқан осы фестивальде 1-дәрежелі дипломмен, алтын медальмен марапатталды. Абай ауданындағы атақты “Қаламқас” ән-би ансамблі құраммен Чехославакияның 27 қаласында өнер көрсетті. Өнердегі өткен өмір белестері Қуандық Боқаевтың «Өнерлі өрге жүзер» кітабында «Абай ауылының ақ Баяны» повесі әнші өмірінен сыр шертеді. Бойындағы бар өнерін еліне арнаған «Ару Баян», «Ақ Баян» қазіргі уақытта Әміре Қашаубаев атындағы филармонияда қызмет етеді.

Кеш барысында «Туған жер», «Іңкәрім-ай», «Биле-биле», “Ғашықтар күтеді», «Бозторғай», т.б. әндер шырқалып, көрнермендердің зор ықыласына бөленді. Сазды кешке әншінің замандас достары қатысып, байырғы тележурналист «Шәкәрім» орталығының қызметкері, әншінің мерейтойын ұйымдастыру комиссиясының төрағасы Мақсат Жарылғасынұлы әнші өмірінен қызықты естеліктер әңгімелеп берді.

Өнер иесінің әншілік өнерін дәріптеуде кеш қонақтарына «Баян ән салады» деген фильм – концерт назарға ұсынылып, қонақ кәде ретінде сазгер Құсмилия Жырғалыұлы әннен шашу шашты. Кеш соңында «Шығыстың ақ Баяны» кітап көрмесіне шолу жасалып өтті.