Ұлы ерлік – ұрпаққа үлгі: поэзия марафоны

  • 18.04.2015

Шығыс Қазақстан облыстық Абай атындағы әмбебап кітапхана қызметкерлері Ұлы Жеңістің 70 жылдығы қарсаңында қаламыздың № 5511 әскери бөлімшесінің сарбаздарына арнап «Ұлы ерлік- ұрпаққа үлгі» атты поэзия марафонын өткізді.

20

Шара басталар алдында жас сарбаздар бір минуттық үнсіздікпен, қыршынынан қиылған боздақтар рухына тағзым етті. Осыдан кейін басталған шарада тарихта ерекше орын алған Ұлы Отан соғысының тарихы туралы, майданға аттанған семейлік жауынгерлердің Мәскеуді, Ленинградты қорғауға, Волга бойындағы, Курск даласындағы шайқастарға, партизан қозғалысына, Украина, Молдавия, Белоруссия, Балтық жағалауы, сондай-ақ еуропалық мемлекеттерді азат етуге, Берлинді алуға, Жапон милитаристерін талқандауға белсене қатысқан даңқты ерлік жолдары слайд көрсетілімі арқылы баяндалды.

20a

Сарбаздар майдангер және кітапханамыздың тұрақты оқырманы Атамбай Оразбаевтың соғыстағы өмір жолы туралы жазылып алынған бейнежазбаны зейін қоя тыңдады. 100-атқыштар дивизиясының жауынгері болған Атамбай ата қазақтың батыр қызы Мәншүк Мәметовамен майдан даласында бірге соғысқанын және оны өз қолымен жерлегенін әңгімеге өзек етті, «қаншама боздақтар Отаны үшін жанын қиған осы қырғын соғысты келешек ұрпақ көрмесін, ел аман, жұрт тыныш болсын» деген баталы сөзімен аяқтады. Шара соңында «Поэзия бұлағы» жас ақындар клубының мүшелері Ж.Қамшыгер, М.Алмасқызы, Г.Жакина, Т.Шерікбай, А.Азанбеков, Г.Сейілова, Ұ.Исмайыловалар Ұлы Жеңіске арнаған жырларын оқып, қатысушылардың қошаметіне бөленді. Сарбаздар мұндай танымдық шаралардың алдағы уақытта да ұйымдастырылатынына сенім білдірді.