Жолаушы, жолға кітап ал!: акция

21 қазан күні Абай атындағы кітапхана қызметкерлері «Тәуелсіздік мерейтойына – 25 игі іс» акциясы аясында теміржол вокзалында «Жолаушы, жолға кітап ал!» акциясын өткізді. Бұл акцияны өткізу «Кітапханаға кітап сыйла!» акциясын ұйымдастырғаннан кейін мүмкін болды.

Шара барысында теміржол вокзалындағы жолаушылар өздері ұнатқан кітапты таңдап, тегін алды. Акцияға ұсынылатын әрбір кітапқа біздің кітапхананың логотипі жабыстырылып, сәт сапар тілегімен жарнамалық буклеттер, бетбелгілер салынды. Жолаушыларға қазақ және орыс тілдеріндегі көркем әдебиеттер (жиыны 3000 дана кітап) сыйға берілді. Акцияға «Қазақстан-Семей» ұлттық телеарнаның журналистері қатысты.

Шара барысында жолаушылардың кітапқа құмарлығы бізді тәнті етті. Көршілес Ресей елінен Алматыға жол жүріп бара жатқан жолаушылар кітапханашыларға ризашылықтарын білдіріп, жақсы бастама екендігін айтып, алғыстарын білдірді. Аталмыш акция қаламызда алғаш рет өткізіліп отырғандықтан әлі де жалғасын табады деп ойлаймыз. Біздің логотипімізбен сыйға берілген кітаптар Ресей мен Қазақстанның көптеген қалаларын аралап, өз оқырманын табатынына сеніміміз мол. Акцияның өз дәрежесінде өтуіне ат салысқан теміржол вокзалының ұжымына алғысымызды айтамыз.