Қуыршақ театры арқылы кітаптар әлеміне: шағын қойылым

27 қазан күні Абай атындағы кітапхананың балалар әдебиеті бөлімінде Павел Морозовтың «Арыстан Васька» атты пьеса-ертегісінен шағын қойылым ұсынылды. Қойылым барысында бүлдіршіндер мысықтың аң патшасы болғысы келіп, оларды алдау үшін жасаған құйтырқы іс-әрекеттерінен нәтиже шықпай, әшкере болғаны көрсетілді. Кітапханашылардың орындауымен қойылған қуыршақ театры кішкентай бүлдіршіндердің көңілдерін көтеріп, олар ертегілер әлеміне саяхат жасағандай болды. Түрлі-түсті әдемі қуыршақтар мен ертегі әлеміндегі кейіпкерлер өздерінің жанды би ырғақтарымен бүлдіршіндерге ерекше әсер етті. Шара соңында балалардың кітап оқуға деген қызығушылығын арттыру мақсатында жасақталған «Ертегілер әлемінде» атты экспозициялық кітап көрмесіне шолу жасалып, балалар өздеріне ұнаған ертегілерді оқуға алды.