Өмірім – менің өнерім: бенефис-шоу

  • 02.12.2016

2016 жылдың 2 желтоқсаны күні Абай атындағы кітапханада ҚР Тәуелсіздігінің 25 жылдығына арналған «25 жұлдызды күн» шеңберінде Семейдің Абай атындағы мемлекеттік қазақ музыкалық-драма театрының әнші-актері Сыдықов Мырзахан Демесінұлының 65 жас мерейтойына арналған «Өмірім –менің өнерім» атты бенефис-шоу өткізілді. Кешке актердің қызметтестері, зиялы қауым өкілдері, М. Төлебаев атындағы музыкалық колледжінің студенттері, БАҚ өкілдері қатысты.
Шара барысында актер ойнаған спектакльдерден үзінділер қойылып, әріптестерінің актер туралы лебіздері экран арқылы көрсетіліп тыңдалды. Кеш қонақтары театр корифейлері Қазақстанның халық әртісі Бекен Имаханов, ҚР мәдениет қайраткері Сапарбек Әшімбекұлы тума талант, дарын иесі Мырзахан Демесінұлы туралы өз ойдарын ортаға салып, жүрекжарды тілектерін білдірді.
Актер 1983 жылдан бері Абай атындағы мемлекеттік қазақ музыкалық-драма театрында әнші-актер болып қызмет атқарып келеді. Оркестрмен опера-оперетталық шығармаларды ойнағанда көрерменнің қошеметіне бөленеді. Драмалық актер мен музыкалық-драма актерының жүгін бірге көтерген актер. Көп жылғы қажырлы еңбегінің арқасында ҚР мәдениет қайраткері атағын алған Мырзахан Сыдықовтың кейінгі жылдары сомдаған рольдері: М. Әуезов «Айман-Шолпан» – ақын Жарқын, Қортық шал; Т. Ибрагимов, Т.Базарбаев «Жас Абай» – Абай; У. Ғаджибеков «Аршын – Малалан» – Уәли; С. Тұрғынбекұлы «Абай – Біржан» – Ақын; А. Ысмайылов «Алдар-Көсе» – Шығай бай; Шығыс ертегісінің желісі бойынша «Кішкентай Мукар» – Сұлтан; «Аладдиннің сиқырлы шамы» – Уәзір; М. Әуезов «Еңлік – Кебек» – Жапал, Р. Отарбай «Ғасыр қасіреті» – Көрші; С. Ахмад «Келіндер көтерілісі» – режиссер образы; М. Ибраев «Шәкәрім» – Қаужақ; С. Кенжеахметұлы «Жарысқазан» – Дәрігер; Ш. Айтматов «Боранды бекет» – Сәбитжан; М. Мақатаев «Жан азасы» – Ақын т.б.
Кеш соңында оқырмандар өздерін қызықтырып, толғандырған сұрақтарын қойып, әншінің орындауында бірнеше әндерін тыңдады. Кешке арнайы «Өмірім – менің өнерім» атты кең көлемді кітап көрмесі ұйымдастырылып кеш қонақтарына ұсынылды.
Мырзахан Демесінұлын мерейлі мерейтойымен шын жүректен құттықтап, шығармашылық табыстар тілейміз!