Балалық шағымның аспаны: фильмнің көрсетілімі
Қазақстан Республикасы Тұңғыш Президенті күніне орай және ҚР Тәуелсіздігінің 25 жылдығына арналған «25 жұлдызды күн» шеңберінде Абай атындағы кітапхананың балалар әдебиеті бөлімі 4 желтоқсан күні №5 мектеп-гимназиясының 6 «Ә» сынып оқушыларына Қазақстан Республикасы Тұңғыш Президенті Нұрсұлтан Әбішұлы Назарбаев туралы «Балалық шағымның аспаны» атты көркем фильм көрсетілімін ұйымдастырды. «Балалық шағымның аспаны» фильмі – Елбасы Н.Ә.Назарбаевтың балалық шағы, есею жылдары туралы түсірілген көркем туынды. Фильм желісі Елбасымыздың «Әділеттің ақ жолы», «Ғасырлар тоғысында», «Еуразия жүрегінде» кітаптарының негізінде өрбиді. Көркем туынды басты кейіпкердің дара болмысын, қайраткерлік мінезінің қалыптасуын, алғашқы табыстарын, үкілеген үміті мен асыл арманын нақты оқиғалар арқылы баян етеді. Бас кейіпкер – бала Сұлтан ұшқыш болуды армандайды. Мектеп бітірген жылы Киев азаматтық авиация институтына оқуға да түседі. Алайда, тағдыр жолы оны басқа биіктерге бастайды…
Көрсетілім соңында фильмнен алған әсерлері туралы оқушылар өз сезімдерін ортаға салды. Көркем туынды өте қызықты, онда қазақ ауылының тыныс-тіршілігі, ұлттық салт-дәстүр, заманына сай саясат түгелдей көрініс тапқанын атап айтты. Шара соңында балалар назарына ҚР Президенті Н.Ә.Назарбаев туралы әр жылдары жарық көрген басылымдарды қамтитын «Менің Елбасым» атты кітап көрмесі ұсынылды.
